第一批見過、摸過、玩過Nokia3315的用家不約而同說：「呢部新機同舊嗰部3310冇乜分別啫！」我倒不這麼認為，就像去年LV推出口靚妹紮辮用的骰仔頭珠，成本幾十蚊印上「LV」一登龍門，數百大元一樣斷市。香港滿街走着名牌木乃伊，請問你會幫襯一部二千多元的韓製或台產不知名手機，還是幫襯售價僅一千的Nokia最新出品？答案我想，後者會大比數勝出。
記者、攝影：余敏協力：King哥
鳴謝：領域電訊(23887812)
誠然，將3310倒模啤多件新機肉確是簡單，不過3315在軟件提升方面亦無偷懶。最強賣點，是將日益升溫的短訊功能全面強化──首當其衝將個人化鈴聲，移船就磡作短訊鈴聲，換言之，3315收到短訊時唔再似以前單音響聲咁易聽錯隔籬，而係可以用晒手機預設的35首再加自編/下載的7首鈴聲作響鈴。
至於舊有3310/3330具備的短訊聊天室和群組短訊功能，3315信手拈來，更附送可增刪句子的短訊範本，免你輸入中文之苦。此外，在網絡支援下，短訊長度可衝破現時普遍約160個英文字母的限制，擴充至201個字母長度。
除了短訊鈴聲成為新增強項外，3315亦首次在3系機中加入自動鎖機功能，用家可選擇自動鎖機及自動上鎖的時間。
另一項3315新增功能，是加入了近期Nokia新機都有的「圖片編輯」，即是將預設作圖像短訊或ScreenSaver的既有圖片，用圖片編輯器加加減減，成為個人化的圖片。當然，用家亦可自行繪製心水公仔，但以鍵盤操控可能要需時適應。
以平價作定位，不難想到3315瞄準的是年輕人市場。為此，3315加入可令年輕人自由發揮的手繩扣位，這在3系機中算是首次。而秉承Nokia傳統可換前後殼的3315，亦在原裝背殼上花了點心思，包上凹凸花紋，手感更實在。而機面與舊作最大不同，是三行數字鍵連成一線，官方用意不得而知，但打慣Nokia內置遊戲的Game友就話，㩒掣操控更GoodFit！