小初由3月底開始，睇住德信控股（758）係咁升，現時終於知道公司搞邊科，原來佢喺自己地頭武漢，搞一級方程式賽車場。經紀陳話呢個係大project，所以應該會吸引到外界留意。
究竟呢個project有幾正？小初唔多留意賽車，所以唔識判斷，但就好關心究竟有冇人幫手炒作，隻股由小初第一次品題到家陣，股價已經由80仙升至噚日1.27元，但成交量就始終唔多，仍然係乾升格局。
經紀陳話，聽講德信今次有個大陸仁兄幫手，講到錢唔係冇，但就頗為小心。總之，如果隻股有大成交出現，有錢賺嘅不妨先計數。
另外，經紀陳又話，股價早前無厘頭急升嘅駿科網絡（8081）可能重有得去，原因係咩就唔知，可能係趁呢排二三線股當旺，順勢炒一轉。
呢隻股喺一個月內，由30仙升至最高70仙，噚日收68仙。小初對於「8」字頭嘅創業板股份，始終興趣一般。
慕容小初