酒店B住過北京好耐，知道北京有小部份人，即所謂大款，有錢得好緊要，但大部份人只係得個睇字，所以王府井大街雖然日日無時無刻不摩肩接踵，東方廣場內啲高檔生意就做唔住，好可能慢慢變成香港環球商場。
酒店B話香港置地在北京推出豪宅，唔少買家係北京豪客，為酬謝啲大客，置地嘅推銷手法好闊綽，就係包咗一個豪華團，請佢哋落嚟香港，住響文華酒店，帶佢哋去置地廣場購物，但全部係自由活動，絕不推銷，豪客買唔買任便，隨得佢。之不過，凡有置地廣場名店購物收條，總數滿十萬元嘅，據傳聞豪客可得現金回贈兩萬！
嘩，如傳聞屬實，置地呢條橋真係高，一來促銷樓盤，二來為自己友文華酒店帶來生意，三來為自己嘅租客帶來大豪客，正是一舉三得，肥水全流自己田，好嘢好嘢。
我哋呢啲港燦，冇乜錢使，入去置地廣場名店LV、Prada、Gucci、太子行Chanel等等，真係有啲自卑感，入面啲人客多數唔係講日文就係講普通話，唔識呢兩種話，怕就嚟冇得撈。
內地遊客來香港，有排旺，中國人口太多，只要百分之一人有錢，已經有一千三百萬人，每人嚟一次，已經逼爆本港酒店。啲錢會走向哪一方，大家不妨諗清楚。