早幾日馮仁昭喺中環一間珠寶店撞到白姐姐同男友謝偉俊（阿Paul）買首飾，白姐姐即刻同馮仁昭show一show男友啱啱送畀佢嘅鑽石蝴蝶心口針。
白姐姐叫嗰心口針做「定驚蝴蝶」，佢話自己嗰朝早當黑，去髮型屋洗洗吓頭，個熱水爐突然爆咗，搞到幫佢洗頭個女仔Amanda灼傷大髀，重要搵十字車送去醫院，而白姐姐除咗嚇親之外，就絲毫無損，個洗頭女仔為佢擋咗一災，可謂不幸中之大幸，所以佢男友阿Paul即刻送番隻價值成萬蚊嘅鑽石蝴蝶心口針畀佢定下驚喎。
白姐姐同阿Paul買完「定驚蝴蝶」後，就走咗去都爹利街睇新舖，原來阿Paul計劃下個月喺中環開律師樓，大展拳腳。
近來電影市道咁淡靜，但楊千嬅同古天樂主演嘅《乾柴烈火》同西片《蠍子王傳奇盜墓迷城外傳》，喺淡市下重可以有過千萬票房，兩部片有咁好嘅成績，馮仁昭都好意外。其實兩部戲水準好普通，觀眾睇《乾》片都係得啖笑，而《蠍》片擺明想食住《盜墓迷城》條水，但水準、特技場面都差好遠，睇完有啲失望。
馬德鐘噚日去咗沙田百貨公司幫資生堂做推廣，宣傳一隻新嘅防曬產品，馬德鐘重即時講佢嘅防曬心得，而佢喺有意無意之間，重講畀大家聽佢想做護膚品代言人，佢話：「男人都要護膚，做facial，清潔塊面，𠵱家男人都要注重儀表，貪靚係應該，我又唔係整容，唔怕人話我貪靚。」
楊婉儀喺過去三年嚟，不停受神秘人電話騷擾，由於對方近日變本加厲，楊婉儀忍無可忍之下，就喺前日報警求助。
馮仁昭噚日同佢通過電話，楊婉儀話報完警之後，嗰個人重繼續打嚟，現階段警方要先查番佢之前嘅通話紀錄，先至有機會查到神秘人嘅身份。
林憶蓮喺紅館舉行一連四場嘅個唱大前晚揭幕，前晚舉行第二場，肥姐沈殿霞、胡楓同太太、何韻詩都有去捧場。憶蓮隔咗六年冇喺香港做騷，身為佢契爺嘅胡楓自不然要去支持吓契女，就連一向低調嘅胡楓太太都唔怕俾記者影相，跟埋一齊去，可見呢對契爺契媽真係好錫憶蓮。
張錦程前晚去咗北角間「燦師傅」餐廳幫手做表演嘉賓，不過錦程出師不利，竟然撞正英格蘭足總盃決賽，搞到在場人士捧波多過捧人，好彩錦程扮嘢伎倆一向出色，佢一出場時就扮鍾景輝把聲嚟介紹自己，𠱁得台下觀眾鬼咁開心。
瘋魔港、日嘅超人氣卡通電視《爆旋陀螺》，已經開始咗拍攝卡通電影版，重會喺今年暑假全日本上映。當地嘅傳媒認為《爆》片將會掀起「後寵物小精靈現象」。《爆旋陀螺》故事係講述主角木之宮孝男熱愛青龍聖獸爆旋陀螺，與使用朱雀聖獸陀螺嘅火渡凱等人進行比試。
亞視外購劇《小甘羅反轉天下》今日首播，為咗有好收視，一班演員包括呂良偉、洪欣等，噚日專程去大嶼山寶蓮禪寺宣傳。而呂良偉得知寺院計劃籌款興建超過億元嘅萬佛寶殿後，即拿出八千元支票作善款，佢話：「起一條柱都要五十萬，但我就捐唔起，所以就用八千蚊捐一尊佛像，如果要刻字梗係刻闔家平安啦。」