中遠太平洋（1199）上周五收報6.40元，升4%，創出去年2月以來新高，炒中國入世概念。招商局國際（144）係同類股，亦有同類概念，近兩個月同中遠嘅股價距離愈來愈遠，有機會追番上去，招商局Call輪咪放過。
招商局Call輪有3件，最正嘅係9131，交投唔多，但3件輪中已經係最多。隻輪9月到期，現價66仙，溢價4.4%，槓桿率9.5倍。睇槓桿率，就知道爆炸力好勁。
招商局近期搞資產整頓，出售低收益資產，基金收貨，𠵱家做6.30元，唔望多，望上到7.00元，升70仙。9131唔係每10份兌1股正股，而係1份兌1股正股。正股升70仙，9131跟6成，都升42仙，計落回報率有64%，和味。
3大石油股交投例牌唔小，但相關Call輪則買賣唔多，要嚟炒恐怕唔係咁啱，攞嚟擺耐啲可以諗吓。
咁多件「油輪」中，最值得諗嘅係中石油輪9070，正股（857）上禮拜五除息4.7仙，隻輪唔再負溢價。現價30.5仙，溢價得0.4%，槓桿率5.1倍，明年1月到期，大把時間。
章 盛