無論做官定從政，如果把口講得，一定會攞到唔少分。噚日香港各界文化促進會搞咗個「精神文明」論壇，中大教授兼人大代表曹宏威用科學觀點講法輪功係邪教，八方對內容無任何取向，但發現曹博士原來「幾talk得」，講半個鐘竟無悶場。
曹博士一開始語出驚人，直指法輪功嘅李洪志係投機神棍，又話佢「個腦轉得快，但唔係個法輪轉得快」。跟住佢好似講古仔咁，分析法輪功用似是而非嘅名詞，抹殺科學文明等等。由於佢語調輕鬆，不時又寸吓工作人員，又話如果大家有興趣，可以請佢食飯傾，令在場人士偶爾哈哈大笑。
今次個活動好多左派中人都有出席，八方重同陳友慶傾咗幾句，佢話法輪功對香港無乜好處，而香港人應該為經濟發展奮鬥。但話題一轉向近日桃色十足嘅寶哥哥，佢就笑着拒絕回應，話唔講人地嘅私事喎。
﹙圖﹚曹宏威演講手舞足蹈非常投入。
E-mail：