各位準備換季之時，有無諗過買番隻靚表襯一襯，想以低成本入貨，不如等小記介紹啲正貨畀你！呢批冧價靚表，唔好以為係低等貨色，佢哋隻隻都有來頭，牌子名你一定聽過，而且全部由幾百蚊減到唔使$150就有交易，絕對係幫手表換季嘅好時機。
記者：許穗齡 攝影：陳偉強
Model：Crystal（StarzPeople）
就快到夏天，買番隻膠表嚟襯衫就最適合不過。呢款GUESS嘅跳字表，以簡單設計的鋼製表面，襯有如啫喱般軟熟的軟膠表帶，夠晒青春可人，而表帶更印滿GUESS的Logo，重有今年大熱嘅薄荷綠、淺紅及黑色等選擇，每隻只售$135，買齊三隻色襯衫都絕對負擔得起。
原價：$550
售價：$135（水貨）（熱點）
今年雖然唔係特別興蛇皮，不過久唔久都會大熱一輪，計小記話趁低價買番隻仿蛇皮表就實無蝕底。呢隻GUESS仿蛇皮行針表，底部以真皮製，戴上手夠晒舒服，表以腕帶式設計簡單唔誇張，由$560冧至$110，的確係超筍貨色。
原價：$560
售價：$110（水貨）（熱點）
CASIO出品嘅菲林表一向係小記嘅至愛，佢夠薄夠型又多顏色選擇，呢款第二代正方形表面襯圓形跳字面就更加有型，功能有齊一般計時、國際時間、電話簿等等，冧價低於一百蚊，當然買得過啦！
原價：$398
售價：$88（水貨）（熱點）
雖說SPOON熱潮已退，不過呢款全金色鋼表就比傳統尼龍帶有型得多。全金色鋼帶襯埋深紅色表面，感覺高貴得嚟又前衞，鋼表有響鬧、防水、計時及日曆等功能，無論功能同款式都屬高檔貨，𠵱家只售$88，小記就覺得絕對買得過。
原價：$250
售價：$80（水貨）（熱點）
買表除咗睇款之外，小記都鍾意收集一啲好玩嘅手表，好似呢款OVO嘅半透明膠表，除咗有齊StopWatch、Memo及鬧鐘功能外，重可以用嚟玩吓占卜，等人無聊時隨手用嚟消磨吓時間都唔錯。
原價：$199
售價：$99（行貨）（熱點）
高貴之選
法國品牌CASTELBAJAC屬中上價位之靚表，牌子名喺香港未必人人都識，但係款式同質料都絕對有品質保證，呢款鋼表就以圓形表面襯長方形表鋼帶，而圓形表面更整個稍為偏左，簡單中又帶點不平凡。
原價：$1,560
售價：$780（行貨）（YourChoice）
如果你唔鍾意戴鋼帶表的話，不妨考慮呢款由瑞士PRIMECLASSIC今季出品嘅便服表，鋼表面配襯鮮紅或鮮橙色布表帶，顏色搶眼又醒神，而表面更以令面同色皮條固定於表帶上，款式設計新穎獨特。
原價：$1,500
售價：$700（行貨）（YourChoice）
嫌太過金光閃閃太俗氣的話，一樣有其他款式選擇。同樣為GUESS出品，呢款鋼表就原用金屬色，而表面則鑲有SWAROVSKI水晶，設計簡單而又高貴大方，冧價後只售$420，又係另一必買之選。
原價：$840
售價：$420（水貨）（YourChoice）
小記覺得每位女士總要有一隻斯文款嘅靚表傍吓身，以免出席大場面時手空空失禮街坊。呢款GUESS嘅金色水晶鋼表就夠晒得體，表面及上下方的第一格表帶均鑲滿SWAROVSKI水晶，夠晒金碧輝煌。
原價：$950
售價：$475（水貨）（YourChoice）
店舖資料
熱點（60740098）
荃灣南豐中心新之城二樓K5號舖
YourChoice（23842003）
油麻地現時點商場110號舖