每個人背後都有個故事，鍾景輝最近為拍於今晚在亞視首播的《尋找他鄉的故事V》，由幕後配音跑到幕前，跑遍波蘭，尋找當地中國人的故事，有老伯離鄉數十載、有音樂家希望建中國博物館、有廚師離開家人覓理想等。
鍾景輝話喜歡「尋人之旅」，卻捱盡辛苦，又要捱凍，人生路不熟，工作上還遇到不少困難、不同的人、不同的故事，鍾景輝發覺，戲劇雖如人生，但人生不如戲劇，因沒有藝術家為你安排一切，相對較難應付。
記者：馮淑玲 攝影：楊錦文（部份圖片由被訪者提供）
波蘭足迹
鍾景輝早前去了波蘭，這是他第一次到東歐，看到鍾景輝穿着厚厚的大褸、戴着頸巾手套、站在白茫茫的雪地上的照片，感覺他好瀟灑飄逸，不過，他卻說這次波蘭之旅很辛苦。
「呢度好早就天黑，晏晝三點半到三點九就黑晒，所以我哋要好早起身，趕喺白天拍完外景；天黑後，就改拍室內景，返酒店又要睇拍好嘅片，有乜要修改或補充，比較喺香港做嘢辛苦好多，起碼喺香港重有一日休息，但喺外面十幾日，幾乎每日都要工作。」
有次，他們為找當地中國人做訪問，曾試過零下十六度跑到戶外，因出門時預計不到會如此凍，全部人都沒穿着早已買了的雪靴，結果踩在厚厚的積雪上，雙腳都痳了。
最慘還是工作上遇到困難，「未出發前，有啲被訪者已經答應好做訪問，點知去到之後，臨時變卦。好似有個中國人，坐過監，佢本來答應見我哋，點知佢太太唔畀佢出嚟，結果取消咗；又試過有個被訪者，我哋去到至發現佢病咗，唔可以接受訪問，被迫要搵另一個，所以有好多突發嘢要去到先知道。」
就如坐車都可能會有突如其來的問題。「有一日我哋坐火車，由波蘭南部去北部，到波羅的海附近的一個小鎮，要坐十幾個鐘火車，因為對嗰度嘅火車站唔熟悉，又唔識講波蘭話，十幾件行李，又重又大件，走來走去，搵咗好耐都搵唔到個站喺邊，好彩最後有個波蘭中國人幫我哋。」
但他們卻發現火車包廂太細，不夠放十多件行李，被迫將部份行李放到另一包廂內，而十多個鐘的火車行程，他們都是坐着，不能睡覺。「以前出國都冇咁辛苦，同演藝嘅學生去埃及、希臘，甚至羅馬尼亞同美國，參觀當地嘅劇場、表演同學校，都唔使好似今次咁，做咁多訪問，又咁多後期工作，成個人都好攰。」
雖然辛苦，收穫卻大，因這是鍾景輝第一次出國尋覓人的故事。「我向來喜歡聽別人嘅故事，每個故事都帶畀我唔同嘅感覺，有感慨、有驚訝、有感動。」
這次到波蘭六個城市，他接觸到六個不同的故事，其中印象最深刻的，是位離鄉別井多年的曲老伯。
「佢五十年前嚟到波蘭留學，原本打算他日學有所成，回鄉報國，點知被迫留喺波蘭，重失去中國國籍，佢覺得背叛咗國家，好歉疚，拒絕同中國人接觸；但十年前，佢遇到一位由山東嚟嘅青年，開始咗一段莫逆之交，令到老伯再次打開心扉，重新認識中國人、中國事，佢𠵱家籌緊錢，打算喺有生之年能夠返鄉下一次。」
此外，還有中國學生到波蘭學畫畫，畢業後以畫畫為生，並希望能在波蘭開辦中國博物館。另有一名中國女子，到波蘭做廚師，她在中國雖有丈夫女兒，但追求波蘭自由廣闊的生活，寧願幾年才回家一趟。
鍾景輝語重心長地說：「睇到華人喺唔同嘅國度奮鬥，掙扎求存，投入當地社會生活，佢哋各有因由，有啲係被賣豬仔、有啲係被迫過去、有啲係嫁到當地，但無論原因係乜，佢哋適應當地生活、求生嘅過程，好值得我哋反省反思，點樣喺困境中面對逆境，尋求解決嘅方法，呢啲都係好值得我哋思考嘅問題。」
戲劇人生
不同的人，有不同的故事，鍾景輝喜歡戲劇，正因那是研究人的一種方法。「點樣搵角色嘅重點同作用、研究角色身體語言、思考方法等，將所有劇本畀你嘅感覺加起來，才能成功演出角色，我呢份興趣好大，個角色同自己性格愈唔同就愈好，唔使做番自己，挑戰性大好多。」
演出多年，他最喜歡的角色是《推銷員之死》內的推銷員、《瘋癲皇帝》內的亨利四世及《風雨守衣箱》內的衣箱管理員，而影響其最深的是美國劇作家懷爾德的《小城風光》。「個劇係講生老病死，主角係個女仔，佢死嘅時候，先至發現自己年輕時冇關心過媽媽，這令我覺得要多關心身邊嘅人同事，我覺得這類劇應該每五年做一次，等年輕人睇咗，感覺到人生嘅意義。」
回看自己的人生，鍾景輝覺得自己遠較波蘭華人幸運，因他是為興趣而活。「我好好彩，一生都做自己喜歡嘅嘢，就係戲劇，父母一直都支持我，尤其是五十年代初，我要去美國耶魯大學念戲劇，其他人會覺得冇乜嘢用，但我父母就好支持我，認為行行出狀元，若當初我冇去，𠵱家我可能做緊自己唔鍾意嘅嘢，就唔會好似𠵱家做人咁樂觀。」鍾景輝現在雖已退休，但仍不斷參演舞台劇和電視劇。
雖說戲如人生，但鍾景輝卻不認為人生如戲。「因為人生唔似戲劇，無藝術創作，無經過思考安排，做起嚟會更難應付。但只要每樣事都轉個角度睇，又或用阿Q精神去睇，會對事情嘅厭惡感、憎恨感同悲痛感減少好多，只要用不同角度，就有不同感覺。」
姓名：鍾景輝
別名：戲劇大師、KingSir
年齡：65歲
學歷：培正中學
美國奧克拉荷瑪浸會大學演講及戲劇系學士
美國耶魯大學戲劇學院藝術碩士
教學：
1962-67 回港任教於浸會學院
1967-85 轉做浸會學院兼職講師
1983-2001 香港演藝學院戲劇學院院長
職業：
曾任香港電視廣播有限公司經理（節目及製作）、麗的電視節目監製、助理總經理、副總經理及亞洲電視副總經理等
演出：
舞台：曾執導或參演《蝴蝶君》、《風雨守衣箱》、《蝦碌戲班》等65齣舞台劇，而99年導演《劍雪浮生》更創下在港演出一百場的紀錄
電影：《最愛》、《傾城之戀》、《少年賭神》等
電視旁白：
《絲綢之路》、《尋找他鄉的故事》系列、《孫中山》等
獲獎：
4度獲香港舞台劇獎最佳導演獎（92、93、96及97年）及最佳男主角（94、95、96、99年）
1994 香港戲劇協會10年傑出成就獎
1999 香港藝術家聯盟頒發藝術家年獎（舞台導演）
2000 香港藝術發展局「戲劇成就獎」
2001 香港演藝學院榮譽院士