保安局局長葉劉淑儀，天不怕地不怕，但一提起佢嘅寶貝女，葉太成個人就會軟晒。無堅不摧嘅葉太，喺個女目中嘅竟然係「笑容少咗啲、年紀大咗啲，手腳慢咗啲」，你話做阿媽幾難做。
熱門部長人選葉劉淑儀，除咗要維護政治立場，當然要做吓公關功夫，適逢母親節將近，葉太接受一個特輯有關做阿媽嘅訪問，喺節目度重公開唔少佢愛女嘅照片。
葉太坦言，個女埋怨佢平時笑容太少，年紀又大，唔可以陪佢好癲咁玩。雖然係咁，葉太一定會抽時間陪個女。除咗分享佢做嘢之外，兩母女都會一齊睇戲，不過「我鍾意嘅，佢又唔鍾意」，結果大家要分開睇唔同嘅戲。
雖然女兒只得十二歲，但人仔細細好鬼招積。葉太曾叫佢教自己用電腦的「copyandpaste」，點知個女一口拒絕，因為「教識你，我咪無利用價值，阿媽學多樣嘢容乜易飛起佢？」
唔單止咁，葉劉重話個女係一個標準政府擁躉，十分支持政府決策，除咗聽到批評佢嘅新聞會好嬲之外，就算不是阿媽處理嘅政策，一樣為政府護航。唔知數十年後，會唔會繼任母業呢？
另外，做人阿媽者，當然都會做人個女。葉太憶述，患癌症嘅媽媽，當時喺入院前，好想恤一個髮，最後髮型師上門效勞。兩三日後，其母也離開人世，能夠為母親完成心願，此刻正接受訪問嘅葉太，臉上湧起一份十分少見嘅柔情。
﹙圖﹚葉劉淑儀昨一身簡服出席一個執法人員慈善跑籌款及火炬傳送儀式，為參加者鳴鑼開道。 王子俊攝
E-mail：