賓架李與賓架廖嗰位千金嘅情緣，轟動中環，賓架界冇人唔講，但大家都同李廖兩家人相熟，又唔係幾好意思諸多評論，況且呢啲嘢，冇乜邊個夠膽話自己清白過聖人，邊度敢丟出第一塊石頭呀？
於是大家轉咗去講對鞋，點解會擺喺酒店房門口，俾記者影到相呢？啱啱呢晚食飯坐響酒店B隔籬，佢以前駐在北京、新加坡，做過五星級豪華大酒店總經理，知道酒店嘅運作。
酒店B同左丁山講：「記憶之中，巴黎LeBristol係一間傳統超級豪華酒店，約六十間房，服務一流。老酒店嘅做法就係，人客要擦鞋，打一個電話通知管房部（housekeeping），然後擺對鞋喺房門口，侍仔就要拎走，擦好之後，送番上房門口，等客人第二朝攞嚟着。咁高級嘅酒店，客人非富即貴，唔驚俾人偷鞋嘅。我哋新派五星酒店就唔同，房多人客多，唔敢擔保咁多人客，個個自重自律，所以房間內放咗一個擦鞋袋，人客將對鞋放入去，打個電話，侍仔就會上去房間拍門，攞走對鞋，送鞋亦如是，咁樣就會對人客嘅騷擾多咗一啲啲，一啲好奄尖嘅人客會唔高興，批評服務唔夠discreet；不過發生呢單事件之後，相信香港所有闊佬都唔擺對鞋喺酒店房門口咯！」酒店服務，無微不至，擦鞋都有咁多學問，不過有一樣嘢重未得，就係如何阻止狗仔隊入內偷拍。