王喜前晚在演出新城音樂會時，竟邊唱歌邊喝啤酒，在情緒高漲下，還掀起新城DJ露芙的裙子，之後更嘴對嘴擁吻露芙、主持李麗蕊及啤梨。而組合VRF約滿華納後，過百歌迷以為前晚乃他們最後一次演出，他們追着VRF保母車，引至場面混亂。
王喜、陳冠希、VRF、陳小春、傅珮嘉及黃伊汶等前晚到九龍灣會展出席《生力清啤呈獻新城有啲野Show演唱會》，王喜在獻唱時竟邊唱歌邊將一支啤酒喝盡，之後情緒高漲，不時做出怪動作。
當他與新城女DJ露芙合演他自己參照同志電影《藍宇》撰寫的舞台劇時，王喜忽然掀起露芙的長裙，又攬着其腰肢，用手搣她的豬腩肉，令露芙手足無措，到舞台劇演出完畢後，王喜又突然嘴對嘴擁吻露芙及主持李麗蕊，兼錫男DJ啤梨，看得觀眾目瞪口呆。
事後王喜滿身酒氣接受訪問，但他意識清醒地說：「我不嬲唔飲酒，今晚好high，暈暈地呀。」問到何以突然到處錫人？王喜笑說：「我見現場咁高興，咪將高潮帶到去極點囉，我係專業演員，呢啲係專業動作，冇任何猥褻成份，我好乾淨咁去做，人哋點睇我就唔知，作為藝人，唔只面部，身體任何部份都可以表達感情。」
問啤梨被王喜親吻的感覺，他說：「我第一次俾男仔咀，覺得鹹鹹地，OK嘅。」
另外，前晚有過百歌迷特地出席支持組合VRF，因為VRF於上月已與華納唱片約滿，故歌迷們都以為前晚乃VRF最後一次公開演出，有歌迷更不捨地在台前邊看邊大哭。
到完騷後，過百歌迷迫在停車場出口等待VRF，場面混亂。VRF接受訪問時表示：「希望有唱片公司簽我哋啦，不過我哋有實力應該冇問題嘅，只係怕隔太耐會俾人淡忘，我哋可能會分開工作，但盡可能都想一齊做番。」
採訪：李珮洳 攝影：陳志嵐