阿仙奴嘅瑞典中場龍格保最近弗成咁，睇嚟最驚嗰個唔係曼聯教頭費格遜，而係英格蘭波士艾歷臣至真。
龍格保喺禮拜六場英足總盃決賽入咗球世界波，幫阿仙奴最後贏車路士二比○。連埋呢個入球，佢喺近八場波經已入七球，腳風簡直順到不得了。計我求大俠話，家陣艾歷臣肯定騰過費爵爺。點解？事關曼聯要攞聯賽冠軍，除咗要喺禮拜三贏阿仙奴外，重要寄望阿仙奴喺煞科日贏唔到愛華頓；換言之，龍格保弗唔弗，對佢哋都冇乜直接影響；但係英格蘭就唔同，佢哋喺世界盃入咗死亡之組嘅F組，要出線真係不容有失。一個唔覺意喺首場分組賽俾龍格保搞掂，真係分分鐘去唔到次圈。最慘就係艾歷臣嘅愛將碧咸重未知踢唔踢到世界盃，弊在對方嘅龍格保又弗成咁，所以話佢唔驚就假。
身為主辦國代表隊，南韓於備戰上當然少不免較其他球隊更為緊張，拉大隊到濟州集訓，教練軒迪克就下令截晒球員房間的電話線，以防遭記者及其他人打擾影響備戰心情。不過，就無話唔准球員用手提電話，cut晒球員房間電話線都無用。
羅馬王子托迪腿傷較預期嚴重，雖然應該唔會影響佢踢世界盃，不過無辦法踢季尾幾場重要比賽，對佢嚟講都幾難受。日前有傳原來羅馬在上月聯賽對AC米蘭時急於求勝，勉強派當時仍未徹底傷愈嘅托迪落場，搞到佢傷勢加劇，累死佢咁話。無論真定假，𠵱家最擔心佢嘅人一定係意大利國家隊教練查柏東尼。
家陣踢波就好似打仗咁，賽前準備工夫就更加緊要；就好似英格蘭咁，佢哋嘅軍醫就叫班入選國腳喺搭飛機去日本嗰陣時，唔好多過一個鐘，話費事對對腳有不良影響。咁！
碧咸唔知係咪有心同侯利亞玩嘢，竟然喺利物浦開季尾派對嗰日，邀請對方嘅英格蘭國腳奧雲同謝拉特去佢個私人派對。唔使問，利記領隊侯利亞梗係唔畀啦，重話到明所有球員必須出席球會嘅季尾派對。我求大俠就戥奧雲同謝拉特可憐，無端端成為咗磨心。
曼聯嘅英格蘭中場碧咸個樣雖然好前衞，原來家教好嚴，重唔畀個仔布魯克林剪佢個「垃圾頭」髮型。事緣碧咸話布魯克林就嚟要返學，唔應該搞到咁鬼五馬六，所以就下令布魯克林唔准剪同佢一樣嘅髮型。之不過，如果布魯克林到咗十六歲，碧咸就話畀佢自己揸主意，想點剪就點剪。
曼聯今屆雖然極有可能食白果，但係佢哋領隊費格遜禮拜六喺馬場就攞番個安慰獎。事關佢隻直布羅陀之石（RockofGibraltar）贏咗場馬，搞到佢老人家不知幾咁高興。但我求大俠就覺得曼聯今季打得差咗，費爵爺點都要負啲責任，所以佢應該擺多啲心機喺隊波度，唔好成日掛住跑馬。