喺嚟緊9月嘅法國巴黎車展上，福士車廠將會展出一款全新嘅四驅越野車；新車不但造型突出之餘，當中一台馬力輸出強勁嘅3.2公升V6引擎，以及豪華車廂布局，更係賣點之一。
從廠方所提供嘅相片中可以睇到，Touareg嘅造型可謂極富剛勁美，不但拋外嘅車身線條望落極富肌肉感外，頗有神氣嘅頭燈組合，加上大口徑胎軨配搭，一派四驅越野車應有氣派，完全表露無遺。至於車廂方面，由於車長達4750mm、闊1930mm、高1720mm，而軸距更長達2860mm，因而能營造出寬敞嘅車廂空間；另一方面，車內配搭亦以豪華為主，不但裝配有真皮座椅外，用家更可為新車選擇加裝前後獨立冷氣，從而增強車內嘅豪華程度。
機械配搭方面，廠方將會為新車配用一台3.2公升V6引擎，馬力輸出高達220匹，配合多套電子裝備，亦能令Touareg可有不俗嘅性能表現。有興趣嘅車迷，不妨屆時留意一下喇。