上周五美國公布4月份就業數據較市場預期更差，美股散得有道理，至於港股能否擺脫美股影響，本周繼續保持升勢？趙飛雲覺得本周恒指有機會先跌後升。
上周五提過Vodafone走勢跌至100便士有支持，但尾段股價最低跌至96.5便士，最後反彈回98便士收市，100便士關未能守得住，可能今日對和黃（013）會有壓力，趙飛雲手上嘅和黃Call輪9110都要做好跳車準備，寧願先止蝕候低位再買過。
和黃頗大機會回補5月2日嘅上升裂口69.25至68.50元，68.50亦係10日線嘅支持位，就算跌得穿，50日線及20日線67.50元左右亦應守得住，可伺機博反彈。如果滙豐（005）今日回落至93元附近，可買1注滙豐Call輪9030。
大隻藍籌要調整，細價股則相信會個別發展，有實質嘢做緊嘅，不妨望多兩眼，好似早排趙飛雲都短炒過一轉嘅光通數網（155），本周又可以吼位收集。
呢隻股快將正式易名為御泰，本周完成供股後，聽講會注入一項賺緊錢嘅業務，之後重會陸續有動作。大股東上月曾經增持，似乎係正面訊息，若見股價隨大市回落，不妨小注收集。
趙飛雲