日前有傳七三年港姐冠軍孫泳恩，與結婚八年的練馬師夫婿賓康婚姻亮紅燈，昨日孫泳恩母親就此事致電本報澄清，強調女兒與女婿感情要好，婚變一事實屬一派胡言。
孫母說：「我兩、三個星期前，先至去完美國羅省探佢哋，佢哋兩公婆不知幾恩愛，後尾阿康（賓康）有場打吡賽要去美國肯德基，我個女都專登陪埋去，又點會話有事？」
孫母續道：「冇錯阿康係要去紐約，但佢只係去做嘢，而且重係遲啲去，絕對唔係分居，我個女本來都話同埋佢去，但因為我個外孫喺羅省讀緊書，所以先至唔去啫。至於講到我個女同岳敦好似有嘢咁，根本冇咁嘅事，佢哋相熟係因為當年大家喺馬會宿舍住樓上樓下，我個女同岳敦太太都好熟㗎，咁樣講法對我個女、女婿，同埋岳敦兩公婆都好唔公平啫！」