啱啱多咗成五十個前民主黨同社會民主論壇成員加入的前綫，噚日趁天朗氣清搞咗個退修營，老遠走到去大埔洞梓童軍中心入面閂埋門傾足一日，基本上可以話係冇所不談。
好似阿松哥話要搞本土經濟，到𠵱家似乎都係得個講字，前綫就決定要研究社會經濟，回應失業問題，希望兩、三個月有啲嘢睇吓。
召集人Emily劉慧卿就話，希望人多可以做多啲嘢。對好多人將注意力集中喺新加入的人，日後會唔會代表前綫參選方面。
Emily坦言噚日有討論過呢個問題，不過前綫以前選舉係逐單計，即係每個選舉要獨立咁傾，你𠵱家做緊議員，唔代表下次選舉你一定會有份選，每次都係要經過前綫嘅程序通過。
咁嘅機制一定有人有意見啦，事關好多退出民主黨的人，就係覺得自己在民主黨冇機會參選上位，𠵱家嚟到前綫都冇得選，有冇搞錯！結果佢哋決定會在短期內傾吓以往的程序有冇得變，所有嘢傾咗先算。
E-mail：