雖然腦場賣緊嘅滑鼠墊款式多不勝數，不過由於大部份都以平為原則，除材料較粗外，相片圖案亦唔啱用家心水要求。3M新推出一款DIY滑鼠墊套裝，用家只需一貼一剪，便可製成完全個人風格嘅滑鼠墊，自用或送畀朋友做禮物都好有心思。
記者、攝影：徐影龍
鳴謝：EPSON(HK)
自製滑鼠墊最大好處當然係可自行揀選相片做圖案，加上目前數碼相機、掃描器等已普及，相片來源可隨心所欲咁揀選，尤其係送畀朋友作留念，絕對充滿心思及誠意。除放入相片外，亦可考慮製作月曆，美觀又實用，又或將偶像照片、心愛動畫人物、寶貝孩子照片製成滑鼠墊，獨特之餘亦毋須花費大量金錢購買昂貴產品。
目前腦場有幾款同類產品賣緊，不過大部份製作都較差，有啲日子一耐好易會甩出嚟、有啲面層坑紋做得唔好，操作滑鼠時總覺得唔暢順。而製作開文儀用品嘅3M，就推出一款滑鼠墊DIY套裝，不但有齊底、面層膠貼，而且重附有列印對位紙、一張相片級打印紙㖭，唔使電腦專家都可輕易DIY心水滑鼠墊。
淨睇呢個DIY滑鼠墊套裝好似冇乜特別，其實內裏有兩大點頗具心思嘅設計。第一係面層塊膠具有3M專利嘅特別坑紋設計，呢種坑紋不但可大大提高滑鼠順暢度，而且使用一段時間後，塵垢自然會積藏喺坑紋入面，直接減少塵垢積喺滑鼠球入面，用家只需用布清潔滑鼠墊便可，工夫當然亦比清潔滑鼠球簡易得多。
另一項優點，就係呢款DIY套裝採用較薄嘅膠料作底層，令到製成品厚度只有2mm，好處當然係使用時唔會有種強烈升高咗嘅感覺，尤其係需長時間使用滑鼠嘅人士，可減少因滑鼠墊太高而引致各種手腕病痛。
抵讚：將心愛相片製成滑鼠墊的確好玩，送禮自用都咁盞。
要彈：全個套裝只有一個滑鼠墊，剪完後又唔可以再用，$79略嫌稍貴。
3M(HK)
查詢電話：28066111