早前曾提過經紀黃會去麗星郵輪（678）做公司探訪，之後麗星股價果然開始啟航，由上月中嘅3元附近，升到上周五3.75元，成交重大咗好多，睇怕未玩完。
經紀黃話，原先星資行約佢上船之時，重以為人哋搞配股，所以先至搞吓關係，去完先知到原來人哋係就係想配股集資，不過已有外資芬佬要晒，唔使勞煩佢呢類本地經紀。因此佢估計麗星成交量再大啲，股價再炒高啲，就係批股之日。
由於呢排逢外資芬佬掂親嘅股份都好掂，好似啱啱配完股嘅創科實業（669），除咗第一日股價下跌外，好快趣就彈番上去，所以小初對麗星郵輪都唔敢掉以輕心，會花多啲精神睇實。
另外，炒到癲嘅光通信（603）上周五停牌配售認股權證，兼且公布改名做中華城市燃氣。經紀陳問小初，信唔信隻股高處未算高？小初唔敢唔信，因上海幫實力唔可以睇小。
慕容小初