因「碌卡票」引起連番風雨嘅房協馬鞍山曉峯灣畔，昨日就上月搞嘅「曉峯灣畔物業知多少」答問比賽公布結果，房協柯靄邦話美聯答中最多，獎品係Sony數碼相機，美聯話部機值差唔多兩萬蚊。
講開「碌卡票」事件，中原同利嘉閣主席施老闆爆料，話大行同細行合作，以往嘅拆帳比例係細行收90%，大行收10%，𠵱家重搞到係細行收99%，大行只收1%。佢估大行咁都肯制，主要係有細行票，可以好快「跳bar」，收高啲佣。施老闆話佢哋根本唔使同細行合作，若真係要「跳bar」，只要將中記同利記嘅票加畀其中一間就得，但佢哋就冇咁做。不過蘭西好奇想知發展商對有大行此做法有乜感想呢？
施老闆又透露，近期入票嘅新盤，平均4票才有1票真係買樓，曾經試過抽中頭十名嘅買家都唔去揀樓，分明就係碌卡攞着數。原來𠵱家有啲碌卡滿5萬元，可獲成千蚊現金回贈，唔怪得咁多人碌卡入票啦！
蘭西