本月十二日，莫仲光便在一間跨國銀行服務滿二十年。他憑着不斷的自我進修，以及勤奮的工作態度，由文員晉升至今日主管四隊人、手下員工超過七十人的助理副總裁。雖說動力是來自不可預測的危機感，付出卻是休息及娛樂，甚至跟至愛也曾出現危機，幸好懸崖勒馬，方能兩全其美。
記者：朱文俊 攝影：陳穎
現職：跨國銀行助理副總裁
進修歷程：
1983年：銀行學會提供自我進修課程
1986年：理工大學銀行運作高級文憑課程
1999至2000年：公開大學管理深造課程
2000至2001年：公開大學工商管理碩士
2001至2002年：企業管治碩士（修讀中）
修讀對象：莫仲光認為MBA課程最適合有興趣發展生意或是公司管理階層人士修讀。
MBA學費(需修讀60學分)：全期學費約$76,500
查詢電話：27112100
網址：
截止報名日期（10月份開學）：2002年6月29日
中七畢業便踏入銀行界工作的Wilfred（莫仲光），早已意識自己學歷不足，83年便開始報讀銀行學會提供的進修課程，86年再報讀理工大學的「銀行運作高級文憑課程」，並參加銀行學會考試，藉此提高自己的競爭力，回報是令他在92年晉升為助理經理。「當時覺得一切幾順利，直到97年金融危機，令我警醒起來，當時我係透支戶口部門主管，發覺好多香港人資產倒退，甚至出現還款困難，我覺得呢個問題，好有機會發生喺我身上，唯一可以逃過呢個危機的方法就只有自我增值。於是我唔理當時工作壓力，毅然喺99年報讀公開大學一個管理深造課程。」
深造課程於2000年完成後，Wilfred隨即報讀公開大學工商管理碩士(MBA)，他只用了一年半時間便完成了整個碩士課程，成為了公開大學最快完成MBA課程紀錄。不過，亦因為太過專注學業，與太太出現了冷戰危機。「當時我已經晉升到經理，每日工作時間最少都要12小時，加上我一讀MBA就報讀五科，根本冇時間陪太太，平日我同佢嘅娛樂，只有晚黑食飯時睇番預錄電視劇集，星期六、日我通常要溫書，加上OU（公開大學）每次考試都係過年時間，返屋企拜年都要押到最後，根本冇時間陪到佢，所以兩夫妻之間出現冷戰，後來經雙方朋友調停，令我明白無論幾忙都好，都應該抽出時間陪屋企人，所以我應承太太，每年陪佢去一次旅行，大家誤會亦得以解決，後來MBA考試撞正公司有新Project，每日只得三小時睡覺，她都能諒解我。」
Wilfred二十年來不停增值進修，現在每日凌晨四時便回到公司工作，爭取時間讀書。「讀書係一件好孤獨嘅事，但千祈唔好認為要放棄晒所有嘢，最好喺完成一個課程或考完試後，獎勵一下自己，我會選擇食一餐好正嘅日本菜，或者去唱卡拉OK。讀書對自己係一個承諾，我會喺讀書前，公告至愛親朋，話畀人聽我幾時開始讀書，幾時會畢業，咁就唔會中途放棄。
「新出來工作嘅人，要對自己有信心，知自己不足，全力以赴。已工作一段時間嘅人，要檢討一下自己位置，唔好發夢，𠵱家個社會，你達唔到公司要求，就會被淘汰。」雖然Wilfred仍在攻讀第二個碩士課程，但為了保持實力，他還打算明年兼讀工管博士呢！