隨着澳門賭權開放，賭王作好準備以兩大招數迎戰兩位來自美國的對手，其中最煞食的是銀彈政策借錢給賭客。但他承認，對手有質素一流的「科騷」，是葡京難以匹敵的。不過，他語帶嘲諷地說：「（賭權）專利暫時都重好似在我手上，今年年尾我驚佢？都未開張。」
記者問何鴻燊，面對新經營者有何招數？他說：「賭錢最緊要肯借錢，因為冇人袋銀紙去輸畀你。淨呢樣，你哋西方人已經無法子同我哋比較。你點敢借錢？你又未識呢笪地方，佢無膽借吖嘛。無膽借出去畀人，收入咪少囉。」他表示，葡京會加強這方面的工作。
其次是用人迎戰機器：「美國開賭好似機器一樣，啲女仔派牌，揭牌就開，在澳門你慢慢諗都畀你，揸住啲牌慢慢甩，叫又得、嘈又得。美國？掂都唔畀你掂！個女仔（荷官）搵支嘢挑咋！畀你咁慢慢甩，無㗎。」
「佢哋唔係靠張賭桌，佢哋靠機器。美國啲機器唔請人打理㖭喎，着咗盞燈就算數，你咪自己埋去囉。美國賭場嘅收入，佔百分之七十係靠老虎機，而我哋澳門嘅老虎機只佔百分之五。」
但他承認，面對新競爭者「唯一輸蝕係外國賭場科騷好捨得使錢」，有一流質素表演吸引人，但葡京「又鬥牛，又豔舞，乜都試過，但最收得只得兩枱客」。
本報記者