最近，外國方面傳來消息，話向以製造超級跑車，而聞名於世嘅瑪莎拉蒂，現正密鑼緊鼓為旗下嘅新款Quattroporte做研製工作；而新車嘅設計草圖及極小量關於呢部新車嘅資料，最近更已於一展覽上公開咗㖭。
從設計草圖中顯示出，新版瑪莎拉蒂Quattroporte嘅造型將與平治S-Class，以及寶馬7系等豪華轎車一樣，同樣來得極具品味，而且重帶有點豪邁氣派；而圓渾嘅車身線條，不但能令其跑車形象更見突出之外，配合低斜嘅頭燈及全新鬼面罩配搭，亦能令賣相變得更具跑意。至於車廂布局方面，則暫時未有進一步資料；但可以肯定嘅係，車廂布局將被鋪排得極具跑意，兼備有由高級真皮鑲嵌而成嘅座椅，而四門配搭更能方便乘客上落㖭。
同時，該消息又指出，新版瑪莎拉蒂Quattroporte將會採用一台全新嘅4.2公升V8引擎，作為動力核心，馬力輸出約為385匹，加上有6前速波箱作配搭，從而令新車可有更出色嘅性能表現。新車快者可望於2003年底推出，有興趣嘅車迷不妨拭目以待喇。