二○○一年度港姐冠軍楊思琦，家住大坑西新邨，每天乘搭巴士、地鐵往電視城上班，有人覺得這種種舉止有失港姐身份。但思琦卻認為只要活得開心，根本毋須理會他人說三道四，畢竟，她不是一個貪慕虛榮的人。
獅子山下長大的楊思琦，去年捧走港姐后冠後即成無綫力捧花旦，但飛上枝頭的她至今仍住屋邨，上下班時不是搭巴士，便是搭地鐵。而思琦所住的屋邨更連升降機也沒有，為防她深夜返家時會有危險，思琦的父母惟有輪流接送愛女。
思琦表示從未想過要改變現時的生活方式，那管別人會說這個屋邨港姐寒酸，但她絕不會看扁自己。
現年二十三歲的思琦，生於石硤尾大坑西新邨，成長歲月也在這小小屋邨中度過，邨內的每個角落，幾乎都存在着她的童年回憶。
訪問當天，束着兩條辮子的思琦權充嚮導，帶領筆者一邊遊覽她成長的小天地，一邊熱情地講述她童年的點點滴滴。
小公園是每年中秋節玩蠟燭的勝地。
後梯是與兒時朋友鬥膽識玩跳樓梯的地方，結果擦損手腳，還遭母親責罵。
屋邨內一間老字號的茶餐廳，有她至愛的紅豆冰。
記者：記 楊思琦：楊
記 ：介唔介意人哋叫你屋邨港姐？
楊 ：唔介意，點解要介意？就算我搭巴士搭地鐵，都係好正常嘅生活之嘛，唔需要理人哋點睇我。講真，我從來唔介意人哋知我住喺邊，但我介意有啲人知我住喺邊之後，會令我有危險，譬如夜麻麻企喺我屋企門口等我，你唔知啲人會做乜嘢㗎嘛，夜晚一個人收工返屋企時，真係驚㗎。
記 ：你有冇羨慕過其他人居住環境比你好？
楊：細個嗰陣都有嘅，試過去同學屋企玩時，見到人哋屋企咁大，都有問自己點解人哋屋企可以大過我屋企咁多？但後尾諗深一層，又唔覺得自己屋企咁差啫。
記 ：早排有報道話你想搬出大坑西新邨，為家人搵個舒適啲嘅居所，係咪真嘅呢？
楊 ：當日個記者問我，將來如果我賺到錢嘅話，會搬去邊一度住，而我就答話搬去一個更舒適嘅地方。其實，如果想生活好啲，努力啲做嘢咪得囉，人哋畀嘢你做，咪畀心機做好佢囉。不過，現階段我真係冇諗過搬，由出世到𠵱家，二十幾年嚟都係住大坑西新邨呢度，唔多唔少都有感情。
記者 ：小時候生活艱唔艱苦？
楊 ：唔艱苦，幾餐都唔使擔心，我生長喺小康之家，生活唔係好富裕，但亦唔使捱窮。