近日港股交投暢旺，美資大行掃入大藍籌，地產股升極都有。不過唔少人擔心大藍籌升得七七八八，現價追貨會入貴貨，但等個市掉頭的話，又怕係跌浪的開始。所以筆者一向都話有feel就要入貨，其實衝動未必係壞事，最緊要買貨同沽貨都要一樣咁衝動，千祈咪上車衝動，落車就長情。
下一轉筆者睇好航運股，尤其是港口業務大哥中遠太平洋（1199）。中遠近日股價重上6元，勢如破竹，上周五收6.4元，升4%，股價創一年新高，筆者估計中遠重有15%上升空間，至7元以上水平。
中遠有兩隻單頭Call輪，9286行使價4.89元，屬價內輪，2003年11月到期，上周五收0.229元，56.5%引伸波幅。9300行使價7.29元，屬價外輪，2002年11月到期，現價0.56元，49%引伸波幅。正股100日歷史波幅約40%，所以兩隻輪睇落唔算平，只宜短炒。買賣正股使費貴，贏幾格唔夠畀使費，炒輪就唔同，贏幾格就有錢落袋。
鍾斯