八方成日聽到有人批評香港新一代乜都唔識，對於祖國大陸嘅知識更加貧乏得可憐，所以好支持政府資助多啲有關中國嘅刊物。
八方噚日收到「中國香港研究資助局」出版的《研究新域》，裏面有篇文講「中國加入世貿組織，香港商機湧現」，當然睇多兩眼，一睇之後唔使再睇。
因為文章唯一一幅相，話「中國代表在卡塔爾多哈簽署入世文件」，但係圖中明明係「中華台北」代表（台灣經濟部部長林信義）簽署入世文件，代表中國簽字嘅係外經貿部長石廣生，舊年十一月中國入世係幾日嘅大新聞，照計牛頭角順嫂都唔會搞錯，文章重好意思話「香港的研究人員經過深入的探討，向商界及政策制訂者概述中國入世帶來的影響」。
中國香港研究資助局係教育資助委員會屬下機構，都係咁上下水準，試問八方對香港教育邊會有信心？
E-mail：