惡佬明有事到中環，上寫字樓同老細傾工程，傾完之後行吓街，行行吓走到中環中心，有啲肚餓噃，入去一間三文治店（個名佢唔識讀）買一份三文治，嘩價錢嚇佢一跳，二十蚊以上，最貴嘅要三十蚊（小龍蝦三文治）；行番出嚟去另一間超級三文治店，可以自選配料。佢選咗幾樣，問清楚價錢，重貴，成七十皮。於是佢落荒而逃，走落街，見到一間茶餐廳，安樂晒。
惡佬明打個電話嚟呻：「嘩，中環乜咁貴㗎，你日日喺中環食，好唔得掂啫。」左丁山話：「三文治價錢好似從來都係咁貴嘅噃，唔係新聞呀！」惡佬明話：「你真係唔知民間疾苦。我經常喺將軍澳地盤開工，午飯食燒味飯加一碟菜，三十蚊有找，我有啲夥計朝頭早食兩個菠蘿包頂肚，到下午茶時間先去快餐店食特價下午茶（兩點半後），十八皮一碗牛丸麵加一杯茶，咁就算數；我習慣咗將軍澳啲消費，點頂得順中環啲價錢。」啱啱嗰日左丁山買咗一份好好味嘅小龍蝦三文治做午餐，聽完惡佬明咁講，好似有啲食唔落。
諗諗吓，覺得惡佬明有冇誇大其辭呀，搵建築邦求證，建築邦經常巡地盤，港九新界去勻，去到邊食到邊，最知價錢。建築邦話：「惡佬明冇講錯呀。我上日去藍田，見到酸鼻事件㖭。一個四十零歲中年男人喺快餐店內，用個袋裝學生食剩嘅飯餸，啲夥計完全冇出聲，任佢清枱，一啲人嘅生活真係好艱苦，你喺中環日日食，因住食到有痛苦症！」