去年賺大錢交稅交了六十二億元的賭王何鴻燊，接受本報專訪時毫不留情就向賭客澆冷水：到賭場「一定清袋！」但他同時公開傳授到澳門葡京賭場致勝秘技，教大家「清袋清慢些，有得賭耐些」的方法。他建議期望「燊哥請客」的賭客，首選百家樂和廿一點，但「玩老虎機就輸梗」，因為經賭場調校，十個玩老虎機的人只會有一個贏錢。 記者：李慧玲、黎國強
獨市經營賭業四十年的何鴻燊在訪問中，罕有地揭開葡京賭場的神秘面紗，逐一評論不同賭博方式的賭術，並向賭客提供賭馬和賭波貼士。
在賭王位於淺水灣道的豪宅內，記者向這位澳門旅遊娛樂有限公司總經理提出了一個千萬賭徒都有興趣的問題：「如果我去你賭場想贏錢，有甚麼竅門？」何鴻燊哈哈笑：「一定要去賭場玩，我就提議你玩百家樂和廿一點。袋就一定同你清袋，不過就清慢些，有得賭耐些。」
他解釋：「抽水最抽得輕係百家樂和廿一點，輪盤都好輕。好坦白，要識才賭嘅就抽好多水，番攤、骰寶都抽好多水，但那些人一樣去賭。」
老虎機又如何？他說：「玩老虎機就輸梗啦！除非你Lucky到中Jackpot（頭獎）。老虎機，就係Gameofchance（機會遊戲），因為可以調校……全部我可以校？」他透露，葡京賭場的老虎機經調校後，十個人玩九個人輸，一個人贏。
話題稍後由賭場轉到馬場，他說：「（賭馬）又要計馬心（馬的鬥志），又要計練馬師，又計隻馬。賭馬抽水最重，全世界賭博，馬抽水最重，抽二十一個。賭一百蚊，已經唔見咗二十一蚊。賭馬最笨，輸梗！我自己開馬場㗎，我好坦白。」
何鴻燊承認，年輕一輩對葡京、賭馬興趣都不大，所以他經營賭波吸納年輕賭客，他對賭波的貼士是：「今時今日大家賭波鍾意買好多瓣。第一，佢有興趣，第二，佢若果一中起上嚟，收好多錢。但到尾，你記住我呢句，最輸得多就係呢種人，邊度有得畀你中啫，你買咁多瓣，你想中？你開胃！」
在賭客進貢下，他透露去年交了六十二億稅，佔澳門政府開支六成。翻查資料，澳娛前年交稅五十一億元。經濟雖不景，賭王仍生意滔滔。
外界對葡京的風水陣一向大感興趣，但賭王否認自己和下屬曾經布過風水陣：「我完全唔信風水。普通人開賭，紅色都話唔啱，但葡京賭場五顏六色，乜色水都有，無問題。你輸錢賴風水，有乜辦法！我個則師係我親戚，半個鬼佬，邊度識風水！」
他看好澳門賭業的前景，他說：「中國其他地方連香港在內都無交易（開賭）……中國法例寫得好清楚，賭博係六害之一，咁又點能夠容許呢？唯一澳門因歷史遺留，五十年不變，先俾開。」
「中國人性格唔淨只鍾意賭錢，唔肯認輸，一定話贏，個個檸檬咁頭行番出嚟，問佢先生點呀？至多話和局，無話輸嘅，輸到真係面都紅晒，佢都係話和局，贏少少就好巴閉。所以，淨呢樣，已經令賭博好緊要。不過，坦白講，我已經好客氣，所有我嘅大賭場有晒標語，你賭得起先好賭，唔係一定贏，我已經警告晒，大家唔信，以為一定係燊哥請客，無法子啦！」
賭王與二太太藍瓊纓居於淺水灣道一號豪華獨立屋。一直以來，大家只能遠觀，見到灰色的外牆，恍如一座中世紀歐陸古堡；但古堡內裏乾坤，卻鮮有向外披露。賭王今日破例大開中門，歡迎大家透過記者的文字和照片到他家中作客，請──