有「鐘表美女」之稱嘅胡敏珊，噚日凌晨同朋友去咗跑馬地嘅Alfred'sGrille消遣，佢入去餐廳之前，將架「波子」交畀門口代客泊車。
點知泊車時架「波子」撞咗落一部Audi度，而架Audi又撞到另外兩架平治，好似碰碰車咁。
胡敏珊架「波子」左邊車頭凹晒同漏水，更要警方到場調停。而喺警方調查期間，着上一身街坊裝嘅陳冠希咁啱行過，佢趁咗一陣熱鬧就走咗。
之後胡敏珊話：「我架車落地幾個月咋，都幾肉赤，但最緊要個人冇事。」胡敏珊致電男朋友到嚟接佢離開，胡敏珊事後表示餐廳會負責賠償問題。
此外，李珊珊同男友錢嘉樂前晚喺跑馬地拍拖，佢哋啱啱去完同嘉樂爹哋慶祝生日。問珊珊送咗乜嘢禮物畀嘉樂爹哋，佢話：「呢啲屋企人嘢，問番佢屋企人。」珊珊跟嘉樂拍拖飲嘢，可會怕珊珊又飲至醉醺醺？嘉樂話：「你估次次好似去上山詩鈉婚禮咁開心。」
李彩樺及周汶錡噚日去尖沙嘴出席新時裝店DeQUE嘅開幕，設計師森由美重即席為兩人揀咗套啱佢哋風格嘅衫，不過只係睇吓，唔係送畀佢哋㗎。李彩樺話最近節食同勤練瑜伽減肥，效果唔錯，不過減咗幾多磅就唔透露，等達到目標先公布喎。周汶錡就被問到有消息話好友何穎雯月底結婚一事，佢就話：「佢有冇講過先？如果真係就恭喜佢囉。」
李心潔同周俊偉前晚喺銅鑼灣為有份主演嘅新片《見鬼》宣傳，佢兩個同扮青臉鬼嘅工作人員喺街派宣傳氣球，李心潔話：「我都覺得有啲尷尬㗎，但途人都肯接，我拍呢套戲時都唔驚。我會請吳彥祖去睇首映，我唔怕再傳緋聞，因為我哋係朋友啫。」
有傳日本女星藤原紀香早前拍咗一輯露點寫真，但因佢要為世界盃任代言人，先至延遲推出。噚日台灣有消息傳出，話東方魅力本來斟紀香出寫真，但紀香開價高達五億日圓（約三千萬港元），嚇怕東魅。噚日東魅方面回應話：「我哋係有諗住搵紀香發行寫真嘅，但冇坐低傾過。我哋未傾過價錢，會唔會係其他公司開價呀？呢個價錢就見仁見智啦。」
陳昭昭前晚以五位數字酬勞喺深圳登台，着咗件價值七千蚊嘅GucciBraTop上陣，佢今次特登帶埋自己嘅簽名相派畀fans，點知搞到三十幾人衝咗上台搶相，嚇到昭昭三魂唔見咗七魄。問到佢有無俾人鹹豬手，佢就話：「咁又冇，不過當時都好驚，估唔到咁多人衝上台。」
有傳內地知名演員劉曉慶，因涉嫌瞞稅案一事而被拘捕，暫扣留於內蒙。噚日內地《成都晚報》報道，雖然劉曉慶日前接受傳媒訪問時表示身在北京，但有記者向北京市地稅局及北京市朝陽區公安局查詢，有關方面都冇否認，只係話暫時唔回應。
而劉曉慶公司嘅前發行人李虹就話劉現時確係「行動不便」。正同劉曉慶打官司嘅王建中就質疑劉曉慶若非遭扣查，大可出面讓記者拍照。