楊思琦的父親早年曾任職華裔英軍，其後轉職保安，並因表現良好而擢升為經理。而思琦的母親則在銀行擔任文職工作，思琦語帶遺憾地表示母親當年若不是為全心全意照顧升讀小學的她而一度放棄工作，現時其母的事業發展一定不只於此。
楊：我真係好多謝媽咪，如果當年佢唔係放棄工作，全副精神照顧我，我可能已經學壞咗。好似我同期有個同學，就係因為屋企人返工，冇時間理佢，所以學壞晒。
記：屋企管教係唔係好嚴？
楊：由細到大，屋企家教都幾嚴，每日返屋企要做完所有功課，先至可以睇電視。就算同隔籬屋啲小朋友出外邊玩，都要有屋企人陪先至得。不過屋企人咁做，無非都係怕我群埋啲街童，學壞晒。如果將來我有仔女，我都會咁做。
記：不如講吓你以前讀書時嘅嘢。
楊：我小學同中學都係喺又一村嘅瑪利諾神父學校讀書，同我屋企只係隔二十分鐘路程，十幾年嚟，我都係行路返學放學。中學時期因為我媽咪再番銀行做嘢，晏畫唔可以煮飯俾我食，所以爹哋每日畀二十蚊零用錢我出街食飯。
記：你𠵱家已經踏入社會做嘢，使唔使負擔家用？
楊：我爹哋同媽咪都有做嘢，雖然哥哥𠵱家喺外地讀緊書，但屋企嘅經濟唔使我擔心。不過，我每個月都有畀家用媽咪，畀幾多就無謂講啦。
雖然並非生於富裕家庭，但思琦透露十來歲時已有機會隨父母到美國等地旅遊，而每到星期天，一家四口都會出外共享天倫樂。思琦記得在十歲那年，一天她如常與家人到茶樓飲茶，巧遇正在拍戲的劉德華，思琦與兄長把握機會拉着偶像華仔合照，事後更為此事興奮了好幾天呢！