喺本港同國際都有名嘅建築師何弢（註：粵音滔）前幾日喺武漢市傾生意時，突然暈倒被送去醫院，證實係中風，情況一度嚴重，不過消息話，經過搶救後，佢已經恢復知覺，可以自己呼吸，情況暫時穩定。
因為何弢係香港特別行政區區徽設計者，北京對佢一直都好器重，所以佢一出事，武漢人民醫院即刻成立咗二十幾名醫生組成嘅專責小組全力搶救，又第一時間通知佢老婆羅玉琪同埋喺美國嘅女何熒，𠵱家兩人已經趕到武漢，侍奉病床前。
何弢以前不時出現香港「波場」，八方都見過佢，近幾年佢比較多返國內搞生意，不過，前兩日八方喺報紙睇法庭新聞就見到佢個名，原來佢嘅建築師行早年為潮州「米王」呂明才家族設計嘅一間超級豪宅，但卻畀人告設計同建築都有「缺陷」，結果鬧上法庭，前幾日單案啱有新進展。堂堂國際級大師嘅設計都話有問題，邊個會叻過佢呢？
﹙圖﹚何弢（中）及其妻羅玉琪（左）及女兒何熒去年齊齊去波場。資料圖片
E-mail：