著名漫畫家馬龍昨日在港設館授徒，專門教人畫公仔，新館開張大吉，好鬼熱鬧，除咗好多同業例如尊子老兄等到場柴娃娃玩番陣之外，好多曾經成為佢筆下人物的政客都紛紛到賀，八方噚日見到，阿牛、阿人、阿石同何俊仁一眾民主黨人都到咗，華叔唔見人，但就見到個花籃。
不過可惜，馬龍筆下畫得最多嘅人物－－董特首同埋班官員就影都唔見。八方問馬龍，點解唔請「對口單位」領導人？佢哈哈笑話：「如果將來有文化部部長，我會請佢㗎！」
馬龍話，佢呢間教室可能係本地第一間漫畫教室，因為一向本地漫畫呢行都係學徒制嘅，入行者都靠跟師傅。但佢嘅教室會教基本課程，除咗政治漫畫之外，重會教幽默漫畫、故事性連環漫畫、設計漫畫形象等等，而且老中青不限，又冇課程限制。當然，錢就梗要畀啦！一堂收幾錢？馬龍話幾百蚊啫，但單對單，就要面議咯。
﹙圖﹚馬龍（右四）設館授徒，一眾好友如阿牛（右二）、李卓人（右五）等齊齊到賀。
E-mail：