儘管思琦不介意別人叫她屋邨港姐，不理會別人用甚麼眼光去看她，但她卻很介意別人過問她的私人問題，就連早前她拍劇時因腰傷復發，要即時送院診治，她都再三叮囑工作人員不要宣揚開去，何解？
楊：呢啲報道太多，連我自己都覺得好煩，話畀人知，我又唔會好番嘅，雖然我話唔介意人哋點睇，但有啲嘢我真係唔鍾意講，一啲我覺得屬於自我空間嘅嘢，我唔想同人分享。所以有關感情問題嘅，我都無可奉告。
記：喺娛樂圈發展咁低調會好蝕底喎！
楊：我唔介意，總之我希望見報嗰啲係開心嘅新聞。
記：有人認為入娛樂圈嘅女仔多數貪慕虛榮，你點睇？
楊：我唔理人哋點睇，總之我唔係咁嘅人。
記：平日似乎好少見你穿戴名牌。
楊：我好少去名店，但間唔中都會去望吓，睇吓啲款式。我覺得買名牌唔代表乜嘢，都要睇吓件衫適唔適合你着，其實有時着平嘢上身，都可以好靚。
在思琦家樓下為她拍照時，本以為她若碰見街坊的話，或多或少會感到尷尬，但思琦不但熱情地跟街坊打招呼，當她碰見一位年逾七十、眼看着她成長的老婆婆時，更主動要求與婆婆合照留念，絲毫沒有明星架子。
原來思琦因工作關係，已很久沒跟街坊見面了。問她現時跟街坊見面，感覺跟當選港姐前有何不同？思琦調皮地笑說：「以前我唔化妝，𠵱家就要化妝囉！」
撰文：戴彩煥
攝影：陳志嵐
髮型：ChrisCheng（Hair）
化妝：TVB潔姐