財務伍忙於清理公司文件之際，接到一個電話，對方聲音似足年輕女子，女士話：「我哋係乜乜理財顧問，希望能有時間見一見伍先生，為你度身訂做一套理財計劃。」財務伍冇好聲咁答：「知喇知喇，我冇乜錢搞理財計劃，咪嘥你時間。」立即收線，財務伍諗咗一陣，打電話問賓架陳：「你哋推銷理財產品，有冇叫職員用電話搞直銷，亂咁coldcall？」賓架陳騎騎笑：「暫時未至到咁搏命，不過聽講有啲行家贊助投資研討會，可以獨家派人到會展中心追蹤啲觀眾，猛咁推銷，聽講成功率令人滿意喎，我𠵱家已叫手下研究緊，睇吓使唔使學習行家嘅策略。」
銀行、保險公司嘅界線逐漸模糊，大家鬥推保險、基金、理財，一於人釘人，周圍搶生意。銀行靠分行網絡多、保險公司靠經紀多，但主要問題就係如何「集中攻擊」適合對象（冇負資產，有存款，肯投資嘅幸福市民），以省「吸客成本」。
於是有聰明銀行諗到獨家贊助投資研討會，幾百名觀眾排隊入場之際，幾十名sales就密集圍攻，宣傳理財保本產品。大凡嚟聽研討會啲人，肯定袋裏有個錢，已是上佳顧客對象也。
賓架陳親自去扮聽眾，視察實況，佢話啲聽眾普遍年紀較大，平均四十幾歲以上，現場見到唔少阿公阿婆嘅長者級人馬，呢啲老友記勇於發問買乜股票，亦間接顯示咗佢哋好叠水。賓架陳睇完，話要調整吓營銷對象策略、人手喎。