大隻紅籌生猛，中信泰富（267）升5.5%，華創（291）升5.9%，中遠太平洋（1199）升4.1%，連帶佢哋嘅Call輪，更加生猛。
中信Call輪有6件打入10大榜，龍頭輪係9160，前日提過，前日升26%，昨日再升34%。呢鋪，係低溢價發揮槓桿效應，即係輪價比較跟貼正股；有時，高溢價輪醒啲，因為槓桿率夠大。9160今年9月到期，現價31仙，溢價1.9%，槓桿率5.6倍。論數據，重係好靚，不過要提防正股升得急有回吐。
華創輪9059，又係前日提過嘅，前日升10%，昨日再升23%。7月到期，現價1.74元，負溢價1.4%，槓桿率4.7倍。正股個勢未完，隻輪重有上升空間。
中遠Call輪最醒嘅係9300，收56仙，升18%，11月到期，溢價22.6%，槓桿率11.4倍。其次9275，收1.20元，升17%。兩隻輪成交都係麻麻。
正股做6.40元，4個月升咗60%，炒中國入世概念，已呈超買，點都要唞唞氣，相關Call輪買唔過。一定要揀，應揀9275，等回吐至諗。
章盛