喺香港玩彩彈（Paintball）射擊嘅朋友雖然唔少，但就受法例所限，一直都用唔到美國嘅各類槍械。有個最新佔地一萬呎嘅彩彈場，標榜自己改良咗一批符合香港法例及用上自家牌子嘅美式槍，完全對應SMARTPARTS等美國大牌子嘅配件。加上場內又同時售賣RAVEN、DIABLO等名牌彩彈服飾，有得玩又可以Shopping。
記者：張穎倫
攝影：陳盛臣
由於香港、日本等亞洲地區嘅法例都限制彩彈直徑不能大於1cm，而最多配件嘅美國槍就採用2-3cm彩彈，故一直唔可以喺香港玩。老闆就自己設計咗全鋁合金WARDOG彩彈槍，可以用美國用嘅垂直彈壺、推動二氧化碳等各種配件，喺香港、中國內地同日本都係獨家。火力只有約1.5焦耳，遠低於香港法例要求嘅2焦耳，玩家想要支多配件嘅私家槍話咁易。
美式彈壺： 總共可裝1000發1cm直徑彩彈，再加上美式漏斗形設計能更有效將彩彈滑出，大大減少卡住彩彈嘅問題，比香港常見嘅長方形彈壺先進。
鋁合金槍身： 全鋁合金製，硬度十足，但只重1.1kg，再加上彈壺可以垂直裝喺槍身上，大大增加瞄準目標嘅角度，比傳統傾斜式方便好多。
二氧化碳氣罐： 將二氧化碳氣罐裝於槍尾，一方面可以放在肩上開槍，更加穩定。另一方面，氣罐壓力更大，能加快彩彈速度，又可增強彩彈爆開嘅震撼力，更加好玩。
揸槍時以左手作為穩定及掩護，而以右手中指作開槍之用，記住唔好握得太緊，盡量放鬆雙手，先可以瞄得更準。
彩彈發燒友兼老闆嘅Tommy話：「香港唔少人都將真槍、BB彈氣槍同彩彈槍混為一談。其實喺外國彩彈已經係一項完全獨立嘅運動，槍款設計更係專為打比賽而設，與BB彈氣槍以模仿真槍為目的好唔同。希望喺香港引入美式彩彈槍之後，會多啲人玩，甚至參加世界賽，唔止玩玩吓咁簡單。」
雖然呢個彩彈場冇美國2、3萬呎標準場咁大，但佔地1萬呎，以及兩層高嘅樓底，喺香港已算數一數二，比一般6,000呎場大好多。場內柱位亦盡量減少，喺主要通道上更係一條柱都冇，場內又加入唔少樓梯、門及旗幟，學足美國場的布置。
講解室
開戰前可以到講解室研究戰略，中途或完場後亦可以喺度休息。另外，亦設飲品售賣及到會供應，最啱一班朋友齊齊玩。
為咗安全同減少俾彩彈弄污身體，所以裝備應該有齊頭盔、頭巾、眼罩、長袖衫、長褲及槍全套裝備，而鞋就一般運動鞋都可以，非常簡單。
呢度標榜美式玩法，所以除咗引入大量美國裝備外，連玩法都跟足美國比賽。唔單止有最多香港人玩嘅殲滅戰，更有埋搶旗戰同攻防戰，以供各類玩家選擇。
PAINTBALLHEADQUARTERS室內彩彈射擊運動場
場地資料
電話：31060220
地址：九龍灣宏照道11號寶隆中心地下2-3號
收費：每位$250（包全套裝備及100粒子彈；另加彈$60/100粒）
時限：約2小時
營業時間：
星期一至六（12:00noon-8:30pm）
星期日及公眾假期（12:00noon-9:00pm）
＊需致電預約