港股近日累積升幅大，加埋噚日係星期五，假前獲利回吐盤特別多，預咗恒指有沽壓，最終能微升17點收市，其實反映市底相當強。
趙飛雲睇好滙豐（005）及和黃（013）可支撐大市，滙豐由頭撐到尾，升1元，收94.75元，表現冇令人失望，滙豐輪9030亦升近12%，收1.31元。可惜星期五唔想揸重貨過假期，冇去高追，錯失呢一節升勢，惟有寄望下周滙豐有機會回頭時再吸納，不過下周若升破95元企穩，亦須先買1注。
和黃早市受制於71元阻力，午市跌勢較急，收69.75元，由於仍守頸線69.25元之上，趙飛雲冇沽出和黃Call輪9110，9110收51仙，跌7％。收市後有消息話Vodafone發出盈利警告，股價喺歐洲急跌，難怪和黃尾段跌勢轉急。趙飛雲稍後望吓Vodafone張圖，當時見到100便士關失而復得，如果守得穩有機形成雙底反彈，或者對和黃影響唔會太大。不過下周若和黃69元確認失守，9110亦要先止蝕。
美國噚晚公布4月份就業數據，對美股走勢會有影響，大家要留意。
趙飛雲