新地首度委託地產代理發售嘅九龍城獅子石道1號，推出一個禮拜，57個住宅就沽清，發展商同獨家代理中原地產，今日響樓盤現場舉行祝捷會。中原劉一姐自然最高興，因為證明佢地九龍組同事銷售能力強，相信大發展商要搵代理銷售樓盤，佢哋有優勢。今日出席嘅高層，包括周國賢同施永青。
美聯物業同中原地產，罕有地獲長實委託代售紅磡海名軒，美聯話做到7億元，發展商送咗枝香檳畀佢哋；不過，蘭西聽聞，中原都有收到長實嘅香檳。
太古地產曾引用（土地為重新發展而強制售賣）條例，收購尚餘業權嘅灣仔太古匯發展項目，結果庭外和解，成功統一業權，發展商將於下個禮拜一舉行簽約儀式，交由金門建築負責興建。
美聯物業將於下個禮拜四搞「軍天壯志——精英會」活動，屆時精英會會長布少明，將率領30名會員，參加野外模擬戰區非實彈軍事策略演習。
太古地產嘅將軍澳維景灣畔3期重未取得預售同意書，但區內代理行門口已經貼晒字條，話可以預先入票，預早吸客。樓盤未賣，代理已經要鬥定先。
蘭西