港股累積升幅逾千點，但噚日繼續喺高位徘徊，表面上重未有散貨迹象。不過ｉ師傅話，噚日每當恒指跌破11800就有買盤頂住中移動（941）同滙豐（005），但長實（001）與和黃（013）就遭到拋售，加上有消息話大戶已經開始平期指好倉，呢一次升浪可能暫告一段落。
和黃下午轉升為跌，主要受到Vodafone調低無線數據業務嘅EBITDA預測，以致Vodafone喺歐洲股價大跌。呢一次可能會再觸發投資者拋售電訊股，中移動（941）要特別小心，因為由22元水平升至噚日高位27.05元已有回軟迹象，會係拖累大市調整嘅主要股份。
國泰（293）噚日升至13.65元後回吐，倒跌1.1％，收13.45元。此股唔經唔覺已升近15元阿虎嘅目標價，亦由911事件後低位反彈1倍，如果當時大家夠膽跟阿虎撈底，現時都可以提早收爐，唔使咁操勞。
慕詩國際（130）本周累積升幅逾10％，收1.71元。Cookie話下個禮拜至會見真章，幕後會正式開車，到時升勢可能急到冇人追得切。係真唔係呀？阿虎見過環球實業科技（8091）乾升完之後配股，兩日內就跌到阿媽都唔認得，令到阿虎有少少心理陰影。
環球實業以每股0.90元進行配售前，股價收1.37元，噚日收0.60元，累積跌幅達56.2％。據黑客講，有班炒家以為將環球實業配售價壓到有逾30％折讓，就可以放心認購，點知認購之後，先前嘅買盤突然失晒蹤，股價只有乾跌。
阿虎