昨日講人力資源經理陳太買DavidNorton嘅權威著作TheBalancedScorecard，話口未完，交稿之後，就收到一間會議公司嘅電郵，通知佢嘅客戶，DavidNorton來港主持一個為期兩日嘅研討會?工作坊，親自講述如何利用此法達致組織卓越，日期就係五月二十三至二十四日，每位（聽足兩日）收費一萬零九百一十二元（包括午飯、奶茶咖啡）。如果有公司畀錢，即管參加；如果挖自己荷包，點都會肉痛嘅。不過既然《哈佛商業評論》話過，諾頓嘅理念係「七十五年來最具影響力嘅理念」，名牌當前，相信唔少大公司會派人去捧場。
Scorecard可譯做「記分紙」或「記分簿」，打高爾夫球嘅老友記都知道Scorecard幾重要。據講諾頓博士有一次同IBM加拿大喺總裁JohnThompson打完高爾夫球之後，Thompson慨歎：如果佢能夠有一張Scorecard去記載、量度公司嘅表現，做生意會容易啲。諾頓博士靈機一觸，就諗到用「記分簿」嘅概念，但「記分」不可只記一樣，而要兼顧全局，平衡各部門嘅需要，所以要有一張balancedscorecard，一九九二年佢與另一位專家RobertS.Kaplan在《哈佛商業評論》第一次發表論文，九六年呢兩位仁兄就推出新書《TheBalancedScorecard》，詳細闡述如何將公司嘅財務、客戶（市場）、內部工序、學習與成長（員工培訓、人力資源）等四大範圍融合埋一齊去評估，達致平衡。諾頓博士打場波就開創咗一盤大生意，令人歎服！