港股5月首個交易日走勢出現大突破，恒指不但升穿250日線11502阻力，更大幅拋離，高收11780，大升282點，成交更係今年新高129.8億元。
趙飛雲前晚睇見美股杜指由初段先跌105點，然後倒升113點收市，已經預咗恒指噚日裂口升，好大機會要買貴貨。
噚日睇到11點幾，見到恒指唔肯回頭，0.51元買咗30萬份和黃Call輪9110，博和黃（013）追落後，但恒指Call輪9045就冇掂到。
港府拍板將添馬艦地皮建政府總部，替本來已現疲態嘅地產股打咗支興奮針，推動恒指急升，但興奮過後始終會唞唞。
但由於港股升勢已成，相信會由近期升勢較落後嘅和黃及滙豐（005）接力，因此趙飛雲暫時捨棄恒指輪9045，改為主力留意滙豐Call輪及和黃Call輪，博地產股調整，由上述兩股支持大市，恒指要破萬二關，相信要靠滙豐做火車頭。
短期策略可候滙豐（005）回至93元之下吸納1注滙豐Call輪9030，若買入後見滙豐升破95元可再買多1注。
至於倉內嘅和黃輪9110，若見和黃升至72元受阻可先沽出獲利。
趙飛雲