光華新聞社前主任江素惠重出江湖，推動兩岸三地文化交流，八方已經講過。
雄心勃勃嘅江小姐講到明話，𠵱家最緊要嘅就係錢，即係擺明要搵真銀！咁又係，搞文化都要有大水喉射住先掂，所以江小姐正積極開源。
其中一個搵錢途徑，就係利用以前累積的大陸人脈，例如有台商在內地惹下麻煩，叫天不應叫地不靈之時，就係江小姐發揮作用的最佳時刻。
原來以前都試過有咁嘅例子，江小姐次次都擺得平。不過她好坦白咁話，以後自己出來江湖上單打獨鬥，就要收費，如果唔係咁樣點養得成間公司啲夥計！
講到自己今時今日嘅地位，江小姐話要多得毛澤東老婆江青。原來當年她一調到香港，就遇上八○年江青和四人幫受審。
她成為台灣唯一報道江青新聞的權威，每日都覇住頭版，就連江青頭髮有冇染黑，台灣讀者都好八卦想知。於是江小姐就此一炮而紅，建立江湖地位，大陸對她也由此另眼相看。
不過講開八卦，江素惠都未能免俗，前日她遇上財爺阿松，都忍不住追問記協籌款餐會，他會否同伏明霞拍拖出席，又會唔會唱歌傳情？阿松冇否認霞女會來，不過就笑說自己今年都唔會再唱歌了！
雖然話當眾唔唱啫，咁私底下又點呢？
E-mail：