港股周二臨尾發威，以全日高位11497收市，意義相當重大。恒指今年1月初升至11919以雙頂回落，2月在10400水平形成雙底回升，3月低位10561，高位11381，4月低位10610，高位11497，基本上形成一浪高於一浪嘅趨勢，5月可以睇高一線，上試11800-12000阻力。
既然趙飛雲睇好港股5月走勢，點解個倉重係空空如也？原因好簡單，上周落車落早咗，目前港股已升近250日線11509重大阻力位，估計就算噚晚杜指承接周二升勢，重返1萬點之上，港股今日有機升破11500阻力，但高開低收嘅情況仍可能出現，所以寧願等佢回頭才買貨。如果預計冇錯，恒指升破250日線會出現獲利回吐，第一個支持位喺11400至11500水平，可先買1注恒指Call輪9045，待再突破11500水平時加注。
另一個情況係美股噚晚再度回落，港股今日展開調整，若大幅跌穿11400，則候低於11200附近低吸9045，並且可以大注些少。
藍籌股中，目前較落後係和黃（013），和黃不明朗因素較多，但有炒落後概念，由技術走勢圖睇，正蓄勢反彈，可留意和黃Call輪9110。
趙飛雲