Twins前晚在九龍塘大學會堂舉行音樂會，在演唱時，二人竟大發台瘟，既甩嘴，又走音，總之錯漏百出。蔡卓妍和鍾欣桐見狀，立即在台上向觀眾致歉。
二人組合Twins和英皇新人周英杰前晚在九龍塘大學會堂舉行「CrazyFMCrazyFans世紀音樂派對」，吸引約五百名歌迷捧場，蔡卓妍（Charlene）的母親和外婆都有前來欣賞。前晚Twins唱歌時竟甩嘴及走音，大發台瘟。
Twins前晚先演唱新歌《二人世界盃》，可是一開始已甩嘴，之後唱其他歌曲時，竟唱至走音。Twins對於演出失準，顯得歉疚，在台上向歌迷道歉。Charlene說：「今晚（前晚）唱得好衰，好唔好意思，因為《二人世界盃》啱啱錄起，新鮮滾熱辣。」
鍾欣桐（Gillian）則說：「近排我去咗內地拍劇，好少練歌，係有少少走音，但我哋好努力唱，唔係呃飯食，我哋好畀心機練。」
Charlene又說：「我哋唱歌唔係特別好，但好用心去唱。我平時都有留意大家對我哋啲批評。我亦想話畀大家知我哋兩個感情好好，鍾意我哋啲人，應該無分彼此。」
Twins的說話似有感而發，莫非因為歌迷之間不團結？Gillian說：「唔係，我想講我哋係Twins，要鍾意，係一齊鍾意。」對於被批評是「白癡」，Charlene說：「我只會做番自己。」
採訪：胡比
攝影：陳偉權