煲呔上個禮拜曾以英國著名政治肥皂劇《Yes,（Prime）Minister》「是的，部長?首相」人物自況。
講起呢套電視劇就巴閉，表現典型英式幽默，其中飾演公務員阿普爾比爵士的尼格，連首相戴卓爾夫人也邀請他飲下午茶，八七年更獲英女皇頒發CBE勳銜。政治學家更視其中描寫公務員同政治任命部長的衝突為教學素材！八方今次姑且同讀者分享其中一個有關公務員瘦身嘅古仔，睇吓煲呔從中會唔會偷到師。
話說部長哈克上任冇耐，就遇上輿論狠批公務員架構冗贅，再唔瘦身就連部長都要下台，嚇到哈克即刻要手下常務秘書長阿普爾比爵士諗掂佢。點知阿普爾比抱住「部長來又去，公務員長存」心態，處處阻頭阻勢，部長話要減乜都話唔得。
點解部長會受制於秘書長呢？原來秘書長決定咗部長可以睇到乜資料，全部放在一個紅盒子內呈上。如此一來，要畀蕉皮部長踩話都冇咁易！於是哈克部長發現，最後除咗減自己嘅司機、私人助理等之外，其餘乜都減唔成。
雖然第二輯劇集時，哈克升咗做首相，但始終發現自己跳不出公務員的五指山，乜嘢鴻圖大計、改革更新都做唔成。
煲呔以哈克自喻，唔知有乜暗示呢？
E-mail：