【本報訊】「死，真係冇用㗎，對解決問題冇乜幫助！反而繼續活下去先會有改變。」曾經為情自殺，跳樓後雙腿殘廢的科技大學學生Gary，眼見近日自殺新聞不斷，他以過來人的身份勸誡世人愛惜生命，並要關心身邊人，因為尋死只是一刻的衝動，只要一句關切的說話，甚至一個友善的招呼，已可挽回一條生命。 記者：陳倩雯
現年二十多歲的Gary，日前在科大校園接受訪問，希望透過自己的經歷，警惕他人愛惜生命。
Gary九七年考進科大數學系，半年後，人生出現了重大改變。Gary當時的女朋友是他中學時的同窗，兩人拍拖數載，卻因為某些原因而分手，「嗰陣時覺得好內疚，覺得自己做錯事，覺得要補償，好儍！嗰陣時好儍！」Gary說時一臉感慨。這種內疚感覺不斷縈繞着他，分手後七日，他因再受到另一些刺激，於是在一時衝動下跳樓自殺。
從高處一躍而下，人生並未就此了結。「一醒番已經明白，哎呀！蠢咗㖭，其實唔使咁做。」留下了性命，卻保不了雙腿，Gary從此不能走動，餘生須與輪椅為伴。「後悔！點解唔後悔？車住輪椅，生活上好多小事都會面對好大困難。」
努力回想以前，Gary至今仍不能解釋自己當日為何會輕生，只記得那一刻純粹是一時衝動。
從萌生自殺念頭至真正付諸行動，前後不到兩句鐘。「當時有打過兩個電話畀朋友，都打唔通，十幾分鐘之後我就自殺……其實嗰個念頭真係好衝動，可能有人同我打個招呼就會冇事。」他呼籲各人關心身邊的人，「如果發現有啲人唔開心，耐唔中打電話去同佢傾陣偈，可能對佢有幫助。」
Gary今年便在科大畢業，對於未來，他的看法是：「早一日唔喜，遲一日唔憂，應該做咩就繼續做。」
他勸勉世人凡事要先想清楚，不要因一時衝動而做出令自己悔疚的事，「唔開心，就應該瞓一瞓先，因為你攰就會覺得緊張，容易做錯決定，最好休息吓，平復吓先。」