港股周二早市牛皮，午後就急升，恒指收報11497，升136點，成交78.84億元。港股急升主要由地產股帶動，先有賭王露口風話港府一定會減建居屋，跟住政府公布用64億元將添馬艦地皮建新總部，擺到明政府寧願動用資源托市，亦唔願低價賣地來增加收入。
呢種做法基本上違反開源節流嘅財政原則，阿虎就唔知標普同穆迪點睇，但股市及樓市就大為受落。有地產代理話畀阿虎知，最近唔單止有炒家入票掃新盤，重有啲金毛仔問有冇平靚正二手盤，話想入番十幾個。嘩！唔通各路英雄又開始對樓市虎視眈眈？畢竟要喺香港搵快錢，始終離唔開炒股同炒樓，除非連炒家都走去再培訓，同國際大鱷炒債券。
阿虎曾經叫大家留意藍貓概念股德發（928），上市後連升兩日，累積升幅已達35％，周二收0.52元。雖然此股短期或會調整，但仍未到價，相信要見0.80元至會有真正調整。
和記港陸（715）周二勁升24.2％，收0.82元。市場憧憬公司會重組，和黃（013）可能將能源石油化工資產注入和記港陸，至於另有傳聞話將和記電訊注入去，呢個可能性就唔大，同時大家炒時炒，要留意此股可能會大比例供股，抽水用作向和黃買資產，所以可能會有啲震盪。ｅ莉莎則話，所謂注資其實十劃未有一撇，如果股價短期內再大幅急升，例如升至1.50至2元，咁就可能會加快重組。
阿 虎