讀萬卷書不如行萬里路，不少學生都會利用悠長暑假出外遊學，增廣見聞，往年較熱門的地方，都離不開美國、加拿大和英國等歐美國家，不過，隨着近年經濟轉差，動輒花費二、三萬元的遊學熱點，已不是一般家庭可負擔，亦因此造就了中國成為近年遊學的「新貴」，不但價錢夠平，可以學普通話和英文，就連外國沒有的軍營生活、少林功夫都可以一一體驗，誰敢說外國的月亮特別圓。
記者、部份攝影：周麗懿
部份相片由被訪者提供
學歷：香港教育學院四年級學生
遊學體驗：去年暑假以輔導員身份參加北京清華大學普通話夏令營
Ronnie曾往北京旅遊，不過以輔導員身份帶隊就另有體驗。「一個人要照顧咁多人，的確好有挑戰性，因為我負責照顧一班年紀比較細嘅學員，有啲小朋友初期會唔適應好想走，要慢慢同佢哋溝通，到後期見到佢哋由想返香港到唔捨得走，真係好有滿足感。」
Ronnie認為夏令營可提供良好的語言環境，令學生放膽講普通話。「清華老師發音好純正，上堂時又會玩角色扮演，令學生可以投入啲，最重要係出街買嘢都要講普通話溝通，鍛煉機會多了，自然夠膽講。」其實學普通話以外，她說這亦是訓練小朋友獨立、建立人際關係的好機會。「基本上幾個學生會瞓一間房，我哋朝早拍門叫佢哋起身之後，佢哋就要預好時間輪流用廁所，因為遲到的話，就要罰佢哋打拳。」
學歷：理工英語系一年級生
遊學體驗：去年暑假參加惠州牛津劍橋英語夏令營
中四那年已經去過澳洲遊學學英語的Louise，對於返大陸遊學的感覺是：「好抵，團費幾平，學校嘅環境夠大，又有泳池，廁所衞生亦都唔錯，住嘅房亦有獨立廁所。」起程前沒帶甚麼期望，只想可以講講英文，識識朋友，Louise回來後卻對旅程讚不絕口：「導師係牛津劍橋讀緊書嘅學生，質素好好，上堂嘅Handouts，課程全部有晒設計，例如會教一啲唔同地方嘅文化或天文知識，又以遊戲形式授課，同老師一齊打吓籃球，咁樣互動式學習，學到更多生活化嘅英語。」
營內生活頗為規律，基本上一早起身就上早課，下午和晚上有不同的活動，但活動範圍只限於在校園內，晚上十一時就關門。不過，到了周末，輔導員會帶領他們外出玩玩。教她最難忘的，是每晚的特別活動。「有時夜晚大家一齊跳舞，玩到癲晒，真係好開心。經過兩個禮拜嘅相處，最後一晚活動，大家都好唔捨得離開，返香港後，我哋都有約出嚟見面；外國導師就保持以E-mail聯絡。」Louise說今年會以輔導員身份參加遊學團，實行以另一個身份體驗遊學樂趣。
學歷：中三學生
遊學體驗：去年參加少林功夫德育營
小時候看過《少林寺》的功夫紀錄片，啟樟被鐵頭功、鐵布衫等少林絕技深深吸引，對少林功夫如癡如醉的吳啟樟，去年暑假往深圳大鵬灣參加「少林功夫德育營」學武功。
「我哋每朝太陽未出就要起身，刷牙洗臉之後，就要跑圈、拉筋壓腿，然後食早餐，之後再學啲踢腿動作、玩玩兵器，食午餐後就會午睡，瞓醒再耍一陣小洪拳，食晚飯後又再練習日頭學過的武功，之後先至沖涼洗衫，或者同師傅一齊打吓波，約十一點就要瞓覺。」連續如此生活七天後，當啟樟「下山」回家時，吳媽媽稱他「成個人唔同晒」，如今早上起床不再賴床，又會自己摺被，連鼻敏感亦痊愈。啟樟更覺得「自己平衡力好咗，讀書亦專心咗，成績有啲進步。」所以話，武功的確係醒！
學歷：哥哥鄭國盛中三學生；妹妹伉絲為小六學生
遊學體驗：去年一齊參加北京及廣州肇慶的軍訓營
兩兄妹去年暑假連續參加兩個軍訓營，原來是鄭太的精心安排，希望他倆嘗試吃點苦頭，適應壓力，長大後可更堅強。兩兄妹半推半就下，展開三星期艱苦旅程。
可能妹妹較細，對經歷過的事都特別難忘。「試過一次喺廣州肇慶住喺農家地方，諗住採摘山棯食，可能啱啱落完雨，唔小心俾啲草𠝹親，跟住成手都係血。重有嗰個廁所好多蜘蛛網，搞到我唔敢沖涼。」相反，哥哥早已經常參加露營、童軍活動，對軍營生活應付自如。軍訓的內容頗多元化，除一般步操外，也可試坐水陸坦克、實彈射擊、彩彈對抗、槍械裝拆等等，妹妹自言好辛苦，不過亦很開心。
根據學聯旅遊的資料顯示，2000年有近1,000人返內地參加遊學旅行團，而2001年人數已經飆升至1,500人，升幅高達50%。價錢平當然是主要原因，以英語營為例，參加英國的牛津英語探索營16天團，團費就高達$23,980，而參加深圳的牛津劍橋15天英語夏令營，團費只需$5,800，足足平成$18,180！或者你會對國內的設備和內容有所存疑，不要緊，且看幾位去年參加中國夏令營的朋友現身說法，或許會改變你的想法。