負責籌組賽事嘅南華同晨曦搵咗唔少贊助商支持山度士告別賽，喺頭場同正場休息期間，重加插咗現場抽獎，獎品都算幾豐富，有山度士紀念手表同購物禮券等，入場球迷自然開心，現場氣氛相當熱鬧。
大會為咗令到山度士告別賽更加熱鬧，喺頭場就搞咗場球圈名人隊對歌影視明星隊作為序幕。球圈名人隊有胡國雄同陳發枝等前足球先生助陣，影視明星隊亦唔弱，有謝霆鋒、譚詠麟同曾志偉等成班足球發燒友落場，「阿叻」陳百祥就客串現場講波，結果歌影視名星隊就贏四比二。
足總為紀念山度士呢位香港球星，就特別整咗本山度士特刊，裏面有齊「阿山」由初出道至最近幫晨曦捧聯賽錦標，唔同時期嘅精采圖片及剪報，可以話見證「阿山」同香港足運呢二十年興衰，真係好有珍藏價值。