想北上創業，但又唔知做乜好？不少過來人都認為，創業最好是依照自己的興趣來做，因為對一個沒有生意經驗的新丁來說，這樣更能令人積極投入，就算辛苦點亦不覺一回事。如果閣下像溫先生那樣喜歡食麵包的話，不妨也考慮搞間麵包店，所需資金不多，只要找到個好的麵包師傅，36萬已夠做老闆了！
記者：曾順珍
攝影：林栢鈞
溫生在中山星晨花園的商場內開了一間麵包店，賣的麵包全以港式為主，如有香港人至愛的菠蘿包、墨西哥包等，顧客對象多是香港人，間中亦有本地人幫襯。
「我原本喺香港做金行，因為5年前喺星晨花園買咗個單位，加上我個仔又上嚟搞印刷機生意，於是退休後，我就試吓上嚟搞生意。初時都諗咗一段時間究竟可以做啲乜，後來發覺呢度附近無麵包舖，如果想食麵包，就要搭十幾分鐘車出市區買。你知啦，喺呢度住嘅有八、九成都係香港人，於是我就開始構思開一間麵包店。」
溫生看來很有魄力，一點也不像65歲的高齡。就因為鍾意吃麵包卻買不到香港的麵包，於是便和太太夾手夾腳，於今年二月在屋邨商場申請開一間麵包店。
身為整麵包的門外漢，溫生惟有找朋友幫忙，提供意見。
「雖然我唔係呢行，但我可以請師傅做咪得囉，佢哋有做麵包嘅技術，而我就只需要話畀佢知我嘅要求就得。」實情當然不是像溫生說得那樣簡單，但就進行得好快，由籌備到開張都只是花了兩個月時間，因為他們有一個做麵包師傅的朋友，所以便邀請對方做麵包店的顧問，代價是象徵式的利是一封。
「朋友嘛當然唔係太講錢啦，佢會上嚟向我哋嘅師傅提供意見，覺得佢哋做得唔好咩，就會指導佢哋。而我哋三個麵包師傅之中，有啲係喺網上招聘；而本地人同外地人都有，佢哋都係做過星級酒店同高級餅店嘅，所以會知道我哋想要啲乜，同個賣相都會有番咁上下。如果有啲款式佢哋唔知道點整，我會話畀佢哋知，又或者佢哋會有食譜可以跟。」
現在溫生的麵包屋能出品三十多款麵包，如吞拿魚包、菠蘿包、墨西哥包；十數種蛋糕如南瓜蛋糕、紅棗蛋糕、藍莓蛋糕、芝士蛋糕等，還有曲奇餅、雞仔餅及香港人愛飲的豆漿等。賣的價錢比香港的要平得多，菠蘿包大的賣?1，小的賣?0.6，一件芝士蛋糕則約?8。他說最好賣的是菠蘿包、草莓蛋糕和南瓜蛋糕，幫襯的人多是香港人，約佔總體顧客的九成。
「我哋嘅舖頭叫天然麵包屋，用嘅都盡量採用最上乘的材料，如麵粉都係來自美國，而且唔會用香料，全部用新鮮水果做，如南瓜蛋糕，我哋真係到農場買新鮮南瓜做，所以跟內地嘅麵包店不同。嚟緊我哋準備會增加不同類型嘅果汁，切合人客嘅要求。」
除了口味切合香港人外，店舖內的裝修亦跟內地的不同，設計屬歐陸情調，以深啡色為主，營造一種高格調感覺。
「個Idea係我太太諗出來，然後由個仔設計，而賣餅嘅店員制服都係由泰國買返嚟，要佢哋綁頭巾都係想佢哋睇嚟跟其他餅店唔同。我亦會訓練店員喺應對方面要有禮貌，如有客人入嚟要講早晨、歡迎光臨；雖然我哋係自助式麵包店，但見人客抱住小朋友或拖住行李就要幫客人夾麵包。由於內地人嘅文化跟香港嘅唔同，要訓練佢哋都需要一段時間。」
溫生的麵包屋約有800平方呎，共分兩層，下面是舖面，上面閣樓是做麵包的地方。閣樓面積雖然不大，但就放了切麵包、烘麵包的機器，還有雪櫃、發酵機、攪麵粉機、冰粒機等，所有設備都頗齊全。
「我唔知道整麵包需要乜嘢機器㗎，都係啲師傅話要乜嘢，我咪同佢哋一齊去買囉，所有機器都可以喺國內搵到。原來整麵包嘅機器一啲都唔平，全部夾埋要成十八萬㗎。」
由於麵包屋賣的食物贏得不少口碑，溫生表示在星期六、日及公眾假期，麵包店會出現大排長龍的情況，還會有做唔切的情形發生。回顧當初開舖的時候，溫生話真是「揦手唔成勢」。
「當初開舖時可能因為唔熟手嘅關係，有啲客人話要呢啲嗰啲，有啲又話要盒有啲又話唔使，所以都幾難搞；再加上間店舖喺車站對面，好多人客要趕上車，但因為店員唔熟手，所以會好驚收少錢同找錯錢，所以當時場面都幾混亂吓。我哋都試過收到一張一百蚊嘅假銀紙，雖然已經用照銀紙機驗過，但都驗唔出，所以唔再靠照銀紙機，惟有叫店員小心謹慎啲，因為收錯錢，佢哋要扣錢㗎。」
現在麵包店的盈利雖然不多，但溫生有信心可以成為一門賺錢的生意。「其實開間舖頭要等好耐先可以回本，所以我哋打算喺呢兩、三個月內喺附近開多兩間，實行整多幾盤麵包賣多啲錢，生意唔差嘅話，我預計可以在一年內回本。」
溫生話因他開的是麵包店，所以要拿的牌照會比其他行業多，想創業的朋友要注意。
1.先要向中山港口鎮的衞生局申請衞生許可證；
2.再向環保局申請中山市建設項目環境保護立項許可證；
3.消防局便會同時間到店舖查察消防設備是否合格；
4.然後便可到該區的工商局申請營業執照；
5.最後稅局便會發稅務登記證。
6.所有申請費用約三、四百元人民幣。
天然麵包屋創業本錢
租金 （800呎、?12,000兩個月按金1個月上期）
裝修 ?100,000
機器 ?180,000
入貨 ?10,000
人工 （6名）?7,700
員工宿舍 ?4,500（兩個月按金1個月上期）
雜項 ?2,000（水電、管理費等）
流動資金 ?50,000
總投資額 ?366,200
每月平均營業額 ?18,000
每月平均盈利 ?10,000
1.唔好亂信人：搵啱人選不但事半功倍，還會免卻無謂損失。
2.清楚申請甚麼牌：有關資料可到區內工商局的諮詢台詢問，那兒會提供辦理手續的詳情。
3.個體戶註冊：溫生話以個體戶註冊這麵包店的好處是不需要內地合夥人，且申請手續和稅收較簡單，註冊資金一、兩萬人民幣已可，不會像註冊公司最少要有五十萬。
4.沒商場優惠：由於星晨花園的商舖全都出售，所以要租舖，便需自行找業主傾談，所以租戶不會享有任何商場優惠。
廣東啟源律師事務所熊永安律師表示，若想開設麵包店，最重要的是衞生環保問題，因為食物吃進肚裏，人命攸關。另外，如果是自行與業主談租舖事宜，就一定要查清對方的產權證，和小心是否二房東轉租的陷阱，因為若未經業主同意而轉租，租約可隨時被取消。
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。