張燊悅（Nicola）日前喺上海逗留咗四日，演出一連兩晚嘅《梁祝》舞台劇。完成演出後，Nicola即刻走去鬆一鬆，搭車去當地嘅「逍遙池」，一嘗老上海嘅著名按摩手勢。
Nicola喺店內好搞笑咁問：「唔知呢度有冇啲年紀大啲，肥肥哋嘅女按摩師呢？」可惜全店只得年輕女師傅，令Nicola有啲失望，最後佢請咗一個女師傅幫佢按摩，而女師傅就幫Nicola全身按摩，包括佢嘅臀部同大腿等部位。
另外，Nicola趁機品嘗上海街頭嘅小籠包同串燒。佢重去咗唔少明星都愛幫襯嘅「達伶港」，試骨頭火鍋同博客鉢鉢雞，Nicola話：「見到個火鍋咁大煲真係好吃驚，但呢個煲真係好平囉，港幣八十二蚊喺香港一定食唔到。」
記者朱芷瑩上海直擊
台灣金曲獎下個星期日（五號）舉行，除咗鄭秀文、金城武同F4會做頒獎嘉賓外，其他出席嘅香港歌手，重會有許志安、蘇永康、莫文蔚、陳奕迅同梁詠琪，即係話Sammi同安仔會同台。而徐若瑄同日本V6其中三個成員亦會做嘉賓，加上孫燕姿同周杰倫，場面可謂星光熠熠。
馮仁昭有日同個搞演唱會製作嘅老友傾開偈，佢話見台灣組合F4人氣咁勁，於是同F4嘅經理人傾吓合作，希望F4今年喺香港開演唱會，聽講F4嗰邊都好有興趣。不過個老友就同馮仁昭呻，話F4經理人限制多多，又多要求，就算合作得成，相信都會有排煩喎。
陳松伶同契爺楊貫一前晚齊齊由北京返港。
早排曾接受法國美食協會主席頒發會員徽章嘅陳松伶，對於北京嘅美食讚不絕口，佢話：「今次同契爺喺北京食咗好多好嘢，特別係我最鍾意食嘅鮑魚同魚翅，但我都驚會肥。」
今屆香港電影金像獎「最佳女配角」和「最佳新演員」雙料得主林嘉欣前日「衣錦還鄉」返台灣。佢同台灣記者自爆話自己上台領完獎後，俾黃岳泰笑佢話從未見過一個咁肥嘅女仔可以上台領獎，所以林嘉欣已經下定決心喺一個月內減十至十五磅。
冇見一排嘅錢小豪，原來已經同張之亮合組製作公司，搞一部改編自日本漫畫《墨子》嘅電影同電視劇，預料製作費達幾千萬。呢套戲嘅男主角墨子就會搵內地演員葛優做。
錢小豪前日去台灣宣傳時，重話今年底會同女友丘倩鳴拉埋天窗。